Press "Enter" to skip to content

Na ka ‘Look East Policy’ sha ka ‘Visit East Policy’: HM Shangpliang

Shillong, Naiwieng 28 : U MLA jong ka Congress na ka Mawsynram Constituency u bah H.M Shangpliang ha ka Sngi Ba Ar u la ther tyngeh hapoh ka ïing dorbar thawaiñ ka jylla ïa ka jingwan khah khah jong ki myntri ka sorkar pdeng sha ki jylla kane ka thaiñ shatei lam mihngi kynthup sha ka jylla Meghalaya da kaba ong ba ka “ Look East Policy” jongka sorkar NDA mynta ka la kylla ka “Visit East Policy”. Haba kren hapoh ka ïing dorbar u bah Shangpliang u la ong ki myntri sorkar pdeng ki la ïawan bam khana ne picnic sha kane ka jylla bad ki jylla kane ka thaiñ namar ïa ki jinglut nadong shadong la bei beit da ki sorkar jylla. Ka “Look East Policy” ka la kylla mynta ka “Act East Policy” hapoh kane ka sorkar ba la ïalam da u Myntri Rangbah duh ka ri u Narendra Modi bad mynta lei lei ka la kylla “Visit East Policy”. Kine ki myntri sorkar pdeng haba ki wan ki sah ha ki hotel ba bha bad rem dor bad bam bad dih katba mon katba ïa ki bill jongki la siew beit da ka sorkar jylla. ong u bah Shangpliang hapoh ka ïing dorbar. Da ka jingbthah jong u myntri rangbah duh, ki myntri sorkar pdeng naduh u snem 2014 ki la wan khari khari sha kane ka thaiñ hana ban bud dien ïa ki skim pynroi pynpar. Namar ba ki wan kum ki heh sorkar ka sorkar jylla ka hap ban pynlut pynsep beit ïa ki nadong shadong naduh ka bai bam, bah sah bai dem, bai kali bad ter ter ong u bah Shangpliang.