Press "Enter" to skip to content

Plie ka Kayzey Society ïa ka Maternal & Child Health Care Project

Shillong, Naiwieng 28 : Ka Kayzey Society, kawei na ki seng mon trei sngewbha kaba dei ruh ka shlem ai jinghikai jong ka sorkar pdeng, ha ka 26 tarik mynta u bnai ka la plie pyrda ïa ka projej kaba la tip kum ka Kayzey Maternal & Child Health Care Project, ha CHC Mawphlang.
Ka jingthmu jong ka tei ka project ka long ban sam ïa ki dawai bad ki jingdonkam ki ba hakhmat eh na ka bynta ki khynnah kiba hapoh 5 snem ka rta kumjuh ïa ki longkmie kiba kha khun bad ki ba pun khun.
Katkum ka jingïathuh da u CEO jong ka Kayzey Society, kitei ki dawa ki kynthup naduh u Vitamins A, Albendazone, Prenatal Multivitamins bad kiwei pat ki dawai ki ba donkam eh na ka bynta ka koit ka khiah. Ha katei ka sngi 10,000 ngut ki khynnah bad 5000 ngut ki longkmie ki la ïoh ïa kitei dawai ki ba ki donkam ba kin dih baroh shisnem.
Ha kane ka sngi la ïoh ruh ïa ka jingkren na u Doktor ba dei peit ïa ka CHC Mawphlang uba la ong ba ka long ka jingkyrkhu ka ba khraw ïa ka CHC ban ïoh pdiang ïa kitei ki jingnoh synñiang na ka Kayzey, khamtam eh haba ïadei bad ki dawai Vitamin A u ba kim ju kham ïoh shuh mynta la ar snem kynthih ban pyndih ïa ki khyllung ki ba hapoh 5 snem.
Na ka liang u CEO ka Kayzey pat u la ong ba ki sngewkmen haduh katta katta ban noh synñiang na ka bynta ki khunlung bad ki longkmie ki bym kot bor ban ïoh ïa ki jingdonkam kiba hakhmat eh na ka bynta ban ïoh ïa ka met kaba koit ba khiah.
“ Ngi pynpaw ruh ka jingsgewnguh ïa ka Vitamin Angels ka jaka pynmih dawai jong ka ri America kaba la kloi ban phah ïa kitei ki dawai sha kane ka thaiñ ka jong ngi. Kumjuh ruh nga ai khublei ïa ka CHC Mawphlang kaba la kloi ban ïatrei lang na kane ka jing thmu ka jong ngi. Ngi khot ruh ïa kiwei pat ki CHC, PHC, NGOs bad kiwei pat ki health centre ki ba donkam ïa kitei ki dawai ba kin ïatrei lang bad ngi khnang ba ngin lah ban pynïoh jingmyntoi ïa ka jylla hi baroh kawei,” bynrap shuh shuh u Bah Kitkupar Chyne.