Press "Enter" to skip to content

Plie u Bah Lutphar ïa ka jaka jngoh kai pyrthei ha shnong Tynriang

Shillong, Naiwieng :U Bah Lutphar Dkhar uba dei u kyrtong MDC na ka UDP Nongshken Constituency ha ka 22 tarik mynta u bnai u la plie paidbah ïa ka jaka jngohkai (View Point) kaba dang shu dep ban shna thymmai kaba don ha ka shnong Tynriang kaba markhap bad ka Nongshken.
Ha katei ka jingplie ïa katei ka jaka jngohkai la don lang ruh u Sirdar ka Elaka Tynriang, Bah Teilang Khongkhlad u Rangbah Shnong, Bah Lumlang Khongtiang bad ki Riew Rangbah na kane ka Shnong bad ki riew paidbah kiba marjan shnong kum na Nongshken bad kiwei kiwei.
ïa kane ka jaka jngohkai la shna bad pynlut pynsep da u riew shimet u Bah Moi Iawta uba la jer kyrteng ruh ïa kane ka jaka jngohkai da ‘Ka Sur I Mei.’
Ka jingthmu jong une u Rangbah ka long ym tang na ka bynta ban im jakpoh ïa lade hynrei ruh ban kyntiew ia ka roi ka par bad ka ïoh ka kot jong ka shnong bad ki paidbah nongshong shnong hi baroh kawei.
Ha ka jingkren kaba lyngkot na ka liang jong u Bah Lutphar ula ong ba kane ka jaka jngohkai kan kylla long ruh kawei na ki lad kamai kaba lah ban aijingmyntoi ym tang ïa ki trai hynrei ïa ki paid nongshong shnong jong kane ka shnong.Kane ka jaka jngohkai ka jngai tang kumba 26 km na Pynursla.