Press "Enter" to skip to content

Sha u PM bad President ka Ri yn ujor ka NEHUTA

Shillong, Naiwieng 28 : Ka kynhun ki nonghikai jong ka skulbah NEHU hapoh ka lama jong ka North Eastern Hill University Teachers’ Association (NEHUTA) ka la pynkhreh mynta ban pyntip da ka jingthoh shaduh u Myntri Rangbahduh ka Ri, nangta sha President ka Ri ba dei ruh u Visitor ka NEHU halor ki kynrum kynrum kiba don ha ka skulbah NEHU.   Haba kren bad ki lad pathai khubor, u President jong ka NEHUTA, u Prof. XP Mao u la ong, “Hapoh ka shi taïew ngin thoh noh sha u Myntri Rangbahduh ka Ri kumjuh sha u President, sha ka Ministry jong ka Human Resource Development, kumjuh sha ki Lamphang jong ka Lok Sabha bad Rajya Sabha ba kin tip ïa kaei kaba la jia ha kane ka skulbah.”
Katkum ka jingong jong u, ka jingpyntip jong ki shaduh ka sorkar pdeng khamtam eh sha ka Parliament ka long ba ki jingai jingtip kiba shu thok kidei kiba ïalam bakla bad kiba beaiñ. U ong ruh ba ki mang tyngka kiba kongsan kidei ban ïoh beit da ka jingmynjur na ki bor kiba dei bad ïa katei ka kam, dei ban pyntip beit sha ka Parliament. Hynrei u ong pat ba ka jingai jingtip thok sha ka Parliament ka long thik kumba thok ne kumba ïalam bakla ïa ka Parliament bad dei na kata ka daw ki kwah ba ki bor badei peit ki dei ban tip.
U la ong ruh ba ka kam kaba kongsan tam ha ka skulbah kadei halor ka jingmynjur ïa ka mang tyngka ïa kaba dei ban leh da ka University Court. Hynrei la kynnoh ba hapoh ka jingïalam jong u Vice Chancellor, u Prof SK Srivastava ïa katei ka kam la leh khlem da jingmynjur da ka lynti kaba dei, kata da ka University Court, ha kine ki lai snem ba la dep. Katkum ka jingong jong u, katei ka rukom treikam ka long thik kumba ïalam bakla bad shukor ïa ka Parliament.
Nalorkata, u ong ruh ba wat ïa ka kaiphod kut snem ruh ym ju rah satia ha ka Academic Council jong ka University kaba dei ka bor kaba halor ba peit halor katei ka bynta. La kynnoh ruh ba wat ïa ka jinglum jingkheiñ kaba man la u snem ruh ym pat ju mynjur da ka University Court. “Katkum ki kyndon ba ju leh, hadien ka Academic Council, ïa ka Executive Council la pynbud pat sa da ka jingïalang jong ka University Court hynrei ïa kane ruh ym shym la leh satia,” la bynrap biang u President ka NEHUTA uba la ïathuh ruh ba ki don haduh kumba 200 tam ei ei ki nonghikai kata tang ki dkhot jong ka NEHUTA kynthup ïa kiba na Tura Campus.
Ha kane ka sngi, u Prof Mao u la ïathuh ruh ba ha kine ki lai snem u Vice Chancellor u khlem lah ban khot ïa ka Board of Reserch Studies, kaba dei ka kam kaba khia bha. U la ong ruh ba da katei ka rukom treikam, ka kyrdan jong ka NEHU mynta ka la nang hiar arsut ha ka National Institutional Ranking Framework nalor ba ki la don lypa shapoh.
Kawei pat ka jingeh ba utei u nongïalam ki nonghikai u kdew ka long ba utei u VC um ju kham don ha ka jaka trei bad katei hi ka la dei kawei pat ka jingeh watla ki kwah ban ïoh ka jingïatrei lang khnang ba kin lah pat ban kynitew ïa katei ka skulbah. La ïathuh ruh ba dang shen kum ka kynhun ki la pynlong da ka jingsoi kyrteng paidbah na ka bynta badei ban weng noh mardor ïa utei u VC halor ka jingpynduh noh ïa ka Hill Area Special Allowance (HASA). “Ngin sa pynim biang ïa ka jingdawa bad ban kyntu jur ïa ka sorkar da kaba pyntip shaduh ki bor jong ka sorkar pdeng halor kine baroh,” u la ong.
Na ka liang ka NEHUTA, ka la pynkhreh ruh ban shim ïa ka sienjam kaba kham tyngeh naduh ka snem kaban wan, hadien ba ki samla pule baroh ki la dep ïa ka eksam.