Press "Enter" to skip to content

Shah jied u Ophisar ka Veterinary ban leit pyntbit sha England

Nongpoh, Naiwieng, 28: U Dr. Hosterson Kylla, u la shah jied ban leit pyntbit shuh shuh sha ka r England lyngba ka jingbthah jong ka Ministry of Science & Technology, Department of Biotech-nology haduh 1 snem kynthih ka ban sdang naduh ka 1 tarik Nohprah 2018.
U Dr. Kylla, u dei u khun ba hynñiew napdeng 11 ngut shipara jong u Bah GS Warjri bad ka kong K.Kylla na ka shnong Umsning Proper-B ha Ri-Bhoi District u dei ruh u para trai jong u Bah Romes Kylla (Ophisar ka Meghalaya Police ba la khlad noh), ka Kong J.J Kylla, kaba long ka Principal bad ka trai jong ka skul Eden Academy, Umsning, kaba bat ruh kum ka President jong ka Graduates and Post Graduates Association of Ri-Bhoi (GAPGAR) bad ha ki seng kynthei ha Ri-Bhoi, u Bah Rojest Kylla, Chief Forest Officer (CFO) ka Khasi Hills Autonomous District Council (KHADC) bad jong u Bah Rocky Kylla, uba long u Chairman barim ka Umsning Town Durbar, u President barim ka RBYF Umsning Circle.
Une u samla hadien ba u la pyndep ïaka Master Degree (Vety Microbiology) na West Bengal, Agriculture Science, Kolkata, ha u snem 2006 bad bteng ban pyndep ïaka kyrdan PhD (Vety Microbiology) na Central Agriculture University ha u snem 2015 bad u la long ruh u samla ba nyngkong naka jylla Meghalaya ban pyndep ïaka Phd. haka tnad Veterinary haka jylla bad trei ruh mynta kum u A.H& Veterinary Officer (Disease Investigation Office) jong ka Directorate A.H& Veterinary Department haka jylla, hynrei u tei u samla u la ïoh shuh shuh ka lad naka bynta ban dang pyntbit shuh shuh ïalade halor ka subject Microbiology bala jied da ka sorkar India.
Katei ka jingshahjied jong u tei u samla ka dei ruh ka sien kaba nyngkong na kano kano ka tnad sorkar jylla bad dei ruh marwei u samla khasi napdeng 30 ngut kiba la shah jied na kylleng ka thaiñ Shatei Lam Mihngi haki tnad bapher bapher kum ka Agriculture, Veterinary, Fishery bad kiwei kiwei, namar kim ju jied ïaki ophisar naka jylla hynrei naka sorkar pdeng, hynrei u Dr. H Kylla u dei u ophisar ba nyngkong naka tnad Veterinary ka jylla ban leit ha katei ka jingshah pynbit shabar ka Ri ka ban long ha Lancaster University, England kaba un sa mih nala iing naduh lashai ka sngi bala bei pisa lyngba ka scholarship naka sorkar India.
Haba ïakren bad u tei u Dr H Kylla u la pynpaw ka jingsngewnguh bad ka burom ba nyngkong ïa u Blei u ba la pynlong ïa u haduh ba un da poi ha katei ka thong bad u la ong ruh ba kane ka jingshah jied naka bynta katei ka project ka dei naka bynta ki Scientist bad ki Professor jong ka thaiñ Shatei lam Mihngi bala jied da ka tnad Biotechnology jong ka sorkar India bad ka long shisha ka burom ban shah jied napdeng 30 ngut kiba leit naka bynta katei ka jingshah pyntbit naka bynta ka project ba shisnem kynthih.
Kitei ki kiba la shah jied ha katei ka thup jong katei ka project ban leit pynbit ïalade kidei ruh ki Scientist bad ki Professor naki Central Institute kum ka ICAR, bad kiwei kiwei ki college bad University kaba dei tang ïaki master Degree bad kiba la pyndep ïaka PhD bad kane ka jingshah jied u tei u samla ka long ruh ka jingmyntoi ïaka tnad Veterinary ka sorkar jylla ha kaba un leit ruh kum u Associate jong ka tnad Veterinary kaba long ruh kum ka jingkieng hadpeng ka sorkar Meghalaya bad ka sorkar India.
“Ka long kaba eh shisha ban shah jied kum ha katei ka Central project khamtam haka jingpyntbit kaba long haduh 1snem kynthih, hynrei ka dei ka jingtrei shitom bad ba ngim dei ban hun tang ba ngi la pyndep ïaki Master degree lane PhD hynrei ka jingpule kam kut ha u briew” la ong u tei u samla da kaba bynrap ruh ba kum ki samla ngi dei ban bteng beit ïaki jingpule katba ngi dang ïoh ka lad bad ban pyndonkam hok ïaka sap lada ngi don ka jingthrang bad ka jignangnud ba ka lawei ka long kaba phyrnai, u la ong.
U la ai ruh ka jingkhublei ba kyrpang ïa ki kmie ki kpa kiba la sumar bad pyndap pynbiang naduh ka por ba u dang pule, ka tnad Veterinary ka jylla, ka sorkar jylla naduh u Principal Secretary bad kiwei kiwei ki ophisar kiba don ha Secretariat, ki ophisar kiba la kyrshan bad ïarap ïa u met bad mynsiem bad ka Balang u Blei kaba la buh ki jingduwai naka bynta jong u na ka bynta ba un dang lah shuh shuh ban kynjoh ïa u mawmer ha ka jingim jong u. Na ka liang ki kmie ki kpa jong utei u samla u Bah GS War bad ka Kong Country Kylla ki la pynpaw ka jingsngewkmen kaba khraw halor katei ka jingshah jied jong u khun jong ki ban leit shabar ban leit pyntbit shuh shuh ïalade sha ri England.