Press "Enter" to skip to content

Shem jingeh ki nongthoh khubor ban ïoh rung ha ka Convocation NEHU

Shillong, Naiwieng 28 : Katto katne ki nongthoh khubor ki la kynduh jingeh ban rung sha ka jingïalang pynkup burom ïa ki samla pule ha ka Convocation Hall jong ka skulbah NEHU, hadien ba ki bor pahara kim ailad satia ban rung watla ka prokram ka la sdang.
Kitei ki bor pahara khamtam kito kiba ap ïa ka jaka rung kaba nyngkong jong katei ka hall ki la kam ba ki la ïoh ka hukum na shapoh ba ym dei satia ban shah rung namar ba ka jingïalang pynkup burom ka la ïaid shakhmat. Watla na ka liang ki nongthoh khubor ki pyrshang ban ïa kren ruh hynrei ym shym la poi shaei shaei ruh.
Watla kitei ki nongthoh khubor ki la poi ha shwa ban sdang ka proseshon sha ka jaka ban pynlong ka jingïalang pynkup burom kaba la buh ban sdang ha ka por 11.00 baje hynrei ki la hap ban ap slem bha shabar shwa ban ïoh rung shapoh. Katei ka jingïoh rung ruh kadei hadien ka jingïai kyrpad kaba bunsien tad haduh ba ki bor pynïaid na shapoh ki la mynjur, kata ruh hadien ba u Vice Chancellor u la jan dep ban kren.
Kiwei pat ki nongthoh khubor kiba poi ha ka por 11:15 baje ei ei ki la ngat lang ha kajuh ka apot khlem ïoh rung satia shapoh wat hadien ba ki la kyrpad bun bun sien ïa kitei ki nongap. Dei lyngba ka jingtuklar jong u Superintendent of Police (City), Bah SA Rynjah ba ki la ïoh ban rung shapoh, kata ruh tad haduh shwa ba u Myntri Rangbah ka Jylla, Conrad K Sangma un ai ïa ka jingkren.
Ha katei ka convocation wat ki nonghikai jong ka skulbah NEHU ruh ki khlem shim bynta satia.