Press "Enter" to skip to content

Shuwa ka Jubili Rupa, pynsiang rong u MLA ïa ka madan Mawlai Parish

Shillong, Naiwieng : Hashwa jong ka jingrakhe ïa ka Jubili Rupa pynkup burom ïa u Father Rangbah, Marius Thongni, u MLA bad MDC ka Mawlai constituency, Bah PT Sawkmie u la pynsiang rong thymmai ïa ka madan Mawlai Parish jong ka Balang Katholik.
U Bah PT Sawkmie u la pynsiang rong thymmai ïa ka madan, hadien ba ki dkhot ka Mawlai Parish Council ki la ud la nam sha u ba un iarap pynsiang lem ïa ka madan kaba la siang rong mynshuwa, hynrei kaba la jot la pei bad ka la donkam kyrkieh ban siang rong thymmai, namarba ba kin ïoh ban rakhe ïa ka jingdap 25 snem ka jingshakri jong u Father Marius Thongni bad ban pynkup burom ruh ïa u da ka Balang Katholik kaba na Mawlai.
Kane ka jingrakhe pynkup burom kan sdang ha ka 14 bad kan kut ha ka 16 tarik u Nohprah, 2018.Namar ka jingdonkam kyrkieh u Bah PT Sawkmie u la mang ban siang rong ïa kane ka madan na ka MLA Skhim jong u.
Haba kren ha i jingïalang balyngkot shuwa ban siang rong, u MDC barim, bah Linus Shadap,uba long ruh u nongïalam ka Council, u la pynpaw ïa ka jingsngew nguh ïa u MLA bad u la pyrto ïa ki kam jong u, ba kim shym la phohsniew ban ïoh ïa kane ka Skhim bad ba ka jingsiang rong kan urlong kloi.
Katba na ka liang u Bah PT Sawkmie u la ainguh ïa U Blei ba kiei kiei baroh ki la urlong kumba ki kwah, namarba na ka liang jong u, u la artatien khyndiat .
“Nyngkong nga la artatien, ka jingartatien jong nga kam dei ba ngin ym ïoh, namar ka jingïoh lei lei ngin ïoh beit ban siang rong, hynrei ka jingartatien ka la wan, namarba ka pisa kam pat don mynta, hynrei kan sa wan hadien. Hynrei ngi ainguh ia U Blei ba ki don kiba la long la kloi ban trei ïa ka kam, watla ka pisa kan wan hadien,” ong u Bah PT Sawkmie.
Haba pynkut u la ong, “Ngi donkam ïa ka jingïatrei ryngkat na baroh arliang.”Ha kane ka sngi la don ryngkat ruh u Bah Marbud Dkhar, uba long u kyrtong ka Congress ban iakhun ia ka MDC na Mawlai, u Father Jude bad ki dkhot ka Mawlai Parish Council.