Press "Enter" to skip to content

Wer u Lat ban kyntiew kam jngohkai pyrthei, u MR ban seng kam la jong

Pep ki nonghikai ha ka Convocation jong ka NEHU

Shillong, Naiwieng 28 : Ka skulbah North Eastern Hill University (NEHU) ha ka sngi Balang hapdeng ka jingïakhih bad ka jingbym shim bynta jong ki nonghikai, ka la pynkup burom haduh 8,653 ngut ki samla pule kiba pyndep ha ki Degree bapher bapher kaba long ha ka Convocation hall jong katei ka skulbah kaba don ha Mawlai.
Katei ka jingbym shim bynta ki nonghikai jong katei ka skul bah ha katei ka Convocation kadei halor ka nongrim ba ki bor pynïaid jong ka NEHU ki la pynkheiñ lut ïa ki kyndon treikam kaba ïadei bad ka skulbah.
Na kitei ki 8,653 ngut, 147 kidei kiba la pyndep ïa ka PhD, 38 ngut ïa ka MPhil, 1,222 ngut ïa ka Post Graduate bad 7,246 ngut ïa ka Bachelor’s Degree. Kitei ki kynthup lang ruh ïa kito kiba khlem wan kiba la don haduh 6,653ngut.
Ha katei ka sngi u Lat ka Jylla, u Tathagata Roy u la long u Kongsan katba u Myntri Rangbah ka Jylla Conrad K Sangma kum symbud kongsan kiba la pynkup burom da ki syrnod sha baroh kitei ki samla pule.
Haba kren ha katei ka sngi kum u Kongsan, u Lat ka Jylla u la kyntu ïa ki samla pule ba kin pynleit jingmut na ka bynta ka lawei jong ki bad kiar na ka jingshah ïalam bakla ha ka jingim. “Donkam ban skhem ka jingmut ban lait na jingsakma ha ka jingïaid lynti kum ki samla,” bynrap biang u Lat.
Da kaba kyntu ïa ki samla ba ki don bun ki lad kamai ha ka thaiñ, u Lat u la ai nuksa ruh ba ha Goa, ki briew ki im lyngba ki kam jngohkai pyrthei. Katkum ka jingong jong u, lada ha kane ka thaiñ shatei lam mihngi jong ka ri ki pyndonkam tang kumba 5 persen na ka jingdon ka spah mei mariang, ki paidbah ka thaiñ ki la lah ban kiew ha ka ïoh ka kot. Nalorkata, u kdew ruh ba kane ka thaiñ ka riewspah bha ha ka jingdon ki dawai kynbat. “Tangba ngam kwah pat shaphang u Uranium, namar katei ka phang kadei kaba sobjek kaba kham jyrwit jyrwat bha,” u la bynrap biang.
Shuh shuh u la ong ba watla ka jingdawa ban ithuh noh ïa ki ar tylli ki Ktien jong ka Jylla ha ka Khyrnit kaba Phra, hynrei na ka liang ka skulbah pat ka la pyndep la ka jong ka bynta ban kyntiew ïa kitei ki Ktien la ka long ha ka Graduate lane ha ki kyrdan Post Graduate ruh.
Na ka liang u Myntri Rangbah pat u la ong, “Lada ki samla ki ïaid ha ka lynti kaba dei, ka Ri kan kiew, tangba lada kim don pat ha ka lynti kaba dei, ka lah pat ban ïalam sha ka jingjot kaba shyrkhei bad kata kadei ka bor jong ki samla bad ka jingeh kaba ka Ri ka kynduh. U la ong ruh ba ka jingdon haduh 8,653 ngut ki samla kiba pyndep ïa ki jingpule jong ki ha ki kyrdan bapher bapher ka pyni ba ki samla ki don ha ka lynti kaba dei bad kata hi ka la ai jingkyrmen.
Ha kajuh ka por u ong ruh ba na ka bynta ka jylla bad ka ri ba kan kiew stet, tang ka sorkar marwei kam lah satia ban leh, hynrei ka donkam ka jingsnohkti lang naduh ki kynhun bapher bapher, ki jaka pule, ki kynhun nongwan bniah bad ki kynhun seng bapher bapher ha ka imlang sahlang.
Nalorkata, u ong ruh ba hadien ba ki samla ki la ïoh ïa ki degree bapher bapher, ka jingkit kaba khia pat ka shong ha baroh kumno ban plie lad ha ka ïohkam ïohjam bad kata hi kadei ka jingeh kaba khraw ba baroh ki sorkar ki kynduh. Da kaba ong kumtei, u kyntu ruh ïa kitei ki samla ba kin phaikhmat mynta sha ka sengkam sengjam la jong bad ieng ha la ki jong ki kjat khnang ba yn lah ban kyntiew ïa ka Meghalaya ha ki liang baroh. “Lada ym don ki kynhun seng kam lajong bad ym don satïa ka sienjam ban seng kam lajong, da kumta hi ngin ym lah satia ban ïohi ïa ka roi ka pa,” ula bynrap biang.
Shuh shuh u la ong ruh ba katei ka jingkyntu ïa ki samla kam dei satïa ka kam kaba ym lah ban leh, hynrei kadei ka kam kaba la leh da baroh. “Hynrei donkam tang ban shu sdang hangne ha ka thaiñ khamtam haba ka sorkar ruh ka pynshlur bha bad kyrshan ïa ka sengkam la jong,” u la ong da kaba ïathuh ruh ba ka sorkar ha une u bnai ka la rakhe ruh kum u bnai jong ki nongseng kam la jong.
U la ïathuh ruh ba na ka liang ka jylla ka la don la ka jong ka Institute ban peit kyrpang halor katei ka bynta, kata ka Meghalaya Institute of Entrepreneurship ha kaba ka sorkar ka la mang bun bha ka pisa ban pynïaid shakhmat ïa ka kam. “Kin don katto katne kiban ïoh ïa ka kam sorkar, don kiban ïoh kam ha ki kompeni hynrei bun na phi, phi lah ban seng la ki jong ki kompeni bad pyndonkam ïa ka spah kaba ngi don kyrhai hangne bad plie bun ki lad ïoh kam ïoh jam,” bynrap biang u Myntri Rangbah.
Shwa kane la ïoh ruh ïa ka jingkren pdiang na Prof SK Srivastava, Vice Chancellor ka NEHU ryngkat ka jingdon lang u Professor H. Lamin, Pro Vice-Chancellor NEHU, Shillong, Professor G. Singaiah, Pro Vice Chancellor NEHU Tura, nalor kiwei kiwei kynthup ki kmie ki kpa bad ki bahaiing jong ki samla pule.