Press "Enter" to skip to content

Yn pyllait DA ka Sorkar sha ki Nonghikai

Shillong, Naiwieng, 28: U Director ka State Education and Literacy (SEL) u Ambrose Ch Marak, mynta ka sngi balang u la kular sha ki nongïalam ka Khasi Jaiñtia Deficit School Teachers Association (KJDSTA) bad ka Garo Hills Deficit School Teachers and employees Association (GHDSTEA) ba un pyllait noh mardor hapoh shi bnai ïa ka Dearness Allowances (DA) kaba barim kaba la sahteng na ka bynta ki nonghikai skul Deficit Lower Primary bad Upper Primary.
U President ka KJDSTA, u Babu Kular Khongjirem ha ka jingïakren bad u Mawphor u la ïathuh ba u Director ka tnat School Education and Literacy u la kular ban pyllait ha ki san bynta ïa kane ka Dearness Allowances kaba la sahteng hapoh shi bnai.
Katkum ka jingïathuh jong une u nongïalam ka KJDSTA, katkum ka jingkular u Director, yn pyllait ïa kane ka DA sha ki nonghikai skul Deficit Upper Primary bad Lower Primary ha kaba nyngkong eh, kata, 113 percent naduh 1.1.2016 haduh 1.6.2016, 119 percnet naduh ka 1.7.2016 haduh 31.12.2016, 123 percent naduh 1.1.2017 haduh 28.3.2017, 123 percent naduh 1.3.2017 haduh 30.6.2018 bad 125 percent naduh 1.7.2017 haduh 28.2.2018.
“Ngi la kyntu ïa u Director ba un pyllait noh ïa ka DA shwa ka Khristmas bad na ka liang u Director u la pyntip ba un sa bthah ïa baroh ki District School Education Officers (DSEO) ki bym pat phah ïa ka Proposal na ka bynta ka Arrear ki dei ban phah noh la kumno kumno shwa ka 15 tarik u Nohprah khnang ba yn dup lah ban mang bad ban pyllait ïa ka pisa shwa ka Khristmas,” la ïathuh u Babu Kular.
Ha kane ka jingïalang, kane ka kynhun ki nonghikai ka la pynsngew ïa ka jingpyntreikam noh da ka Sorkar ïa ki jingmyntoi ba ki nonghikai skul Deficit ki dei ban ïoh katkum ba la mynjur da ka Fifth Pay Commission. Katkum ka jingmynjur ka Fifth Pay Commission, yn siew ruh sha ki nonghikai skul Deficit ïa ka Death-cum-Retirement Gratuity na kaba ju siew mynshwa T. 3.5 lak sha ka T.10 lak.
Ka KJDSTA ka la kyrpad ruh ïa u Director ban pyllait noh ïa ka tulop sha ki nonghikai skul Deficit manla u bnai khnang ba ki nonghikai kin ym ïakynduh jingeh namar ka jingpyllait tulop shisien lai bnai ka ktah haduh katta katta ïa ka ïoh ka kot ki nonghikai.