Press "Enter" to skip to content

Ba jur palat ka ktieh, donkam kyrkieh ka PHE ïa ka ‘Clari-floculator’ ha Mawphlang

‘Ai da jingthoh ba ka Intake Well ka la kynduh mawsiang’
Shillong, Nohprah 02 : Ka tnad Public Health Engineering (PHE) ka donkam kyrkieh sa kawei ‘Clari-floculator’ ne ka jaka pynkhuid ïa ki jaboh kynthup ïa ka ktieh kiba don ha ka um khnang ban pyntikna ba ka um kaba poi sha ki paidbah kan long kaba khuid khlem da donkam shuh ban ai bun ki dawai pynkhuid um.
Katei ka jingdonkam, ka la paw ha ka jingleit jurip u MLA ka thaiñ Bah SK Sun ba dei ruh u Chief Engineeer barim ka PHE ïa ka jingtrei jong ka Greater Shillong Water Supply Scheme (GSWSS) Phase I bad II kumjuh ruh ïa ka Phase III ha ryngkat ka jingdonlang ki ophisar jong katei ka tnad, khamtam ïa ki jaka tan bad jaka pynkhuid um jong ka tnad ha kane ka sngi Saitjaiñ.
Shwa kane, ki ophisar ki la shem jingeh bha ban pynshai ïa u MLA halor kiba bun ki jingkylli kiba u buh. Hynrei tang hadien katto katne por pat u MLA dalade u la ïarap kylla ïa ki ryngkat ki kyntien ba u wan ban wad ïa ka jingshisha halor ki jingshah kynthoh kiba bun kiba long pyrshah ïa ka tnad. U ong ruh ba ka jingwan jong u kam dei satia ban nang wad daw shuh shuh hynrei ryngkat ki lad ki lynti kumno ban weng syndon ïa kitei ki jingeh.
Hadien ba la pynpaw ba ka tnad ka shem jingeh bha ban pynkhuid ïa um ha ka por Lyiur na ka daw ka jingbun ka ktieh, ki ophisar ka PHE ki la ïathuh ba bunsien ki la hap ban pynbun ka dawai pynkhuid bad dei na kata ka daw ki paidbah ki ju ïoh ïa ka um kaba long bthi. “Lada ngi pynduna ka dawai ban pynkhuid, ki paidbah kin ïoh ïa ka um kaban long jngut hynrei lada pynbun pat ïa ka dawai watla ka um kan khuid hynrei ka don jingma pat ïa ka koit ka khiah,” ong u Chief Engineer ka tnad, Bah SK Blah hadien ka jingjurip ïa kitei ki jaka pynkhuid um ba don ha Mawphlang.
Kumta, da ka jingïasyllok bad ka jingai jingmut lang da u CE barim ba dei MLA ka Mawphlang, Bah SK Sunn, la pyntip ruh ba ka jingshna sa kawei ka Clari-floculator ka la sdang ïa kaba la pyntrei da ka M/S Tantia Construction Ltd, katba ka jingshna ïa ka Inlet Stilling Chamber, ka Raw Water Channel, ka Parshall Flume, Constant head chemical dosing tank bad ka Flash Mixer na ka bynta ka katei ka Clari-floculator ym pat sdang satia. La pyntip ruh ba ka jingshna sa kawei ka Chemical House ym pat sdang shna satia.
“Lada la dep shna sa katei kawei ka Clari-floculator, kan pynsting haduh mar shiteng ïa ka jingtreikam jong katei ka clari-floculator kaba rim bad kane kan ïarap ban pynduna ïa ka jingpyndonkam ïa ki dawai pynkhuid um (Alum solution). Na ka liang u kontraktor ka TCL ba pyntrei ïa ka Phase III ruh u la kular ban shna pyndep noh ïa ka Clari-floculator, Additional Chemical House bad Inlet Works na ka bynta katei ka Clari-floculator ha shwa ban poi ka aiom slap jong u 2019,” ong u Bah SK Sunn haba kren bad ki lad pathai khubor.
U ong ruh ba kum u nongmihkhmat jong ka thaiñ ba don katei ka jaka tan um, u don ka jingkitkhlieh ban peit ba ïa katei ka projek la pyntrei bha namar katei ka bynta kaba kongsan tam ban bsa umbam umdih ïa ka nongbah Shillong baroh kawei.
Ha ka jingleit jurip pat ïa ka jingtrei jong ka Phase-III, ki ophisar hapoh ka jingïalam jong u Chief Engineer ki la pyntip ba ka jingtei ïa ka Intake Well la pynsangeh la ar snem mynta tang namarba ka M/S Taintia Construction Ltd kam lah satia ban pyntikna da ka jingthoh ba katei ka jingtei ban buh ïa ka Pump House ka la kynduh mawsiang.
“La arsnem ka kam ka la sangeh tang namar ba u kontraktor um ai da ka jingthoh sha ka tnad ba katei ka Intake Well ka la kynduh mawsiang. Ka Pump House ka lah ban ngam bad twa lut lada jïa ka jingtei kam pat ïoh ban shong skhem halor u mawsiang,” ong u Chief Engineer.
Halor kane, ka bynta, u Bah Sunn u la ong ba kum u dkhot ha ka sorkar, u ban jur ïa utei u kontraktor ban ai da ka jingthoh sha ka tnad ban pynshisha ba katei ka jingtei ka la shong skhem bad ba ka la biang ban bteng ïa ka kam. Haba ïadei pat bad ka jingtei ïa ka Intermediate Pumping Stations, la lap ba katei ka kompeni kam pat lah satia ban pyndep wat ban tih ïa ka khyndew.
U Bah Sunn u la ong ruh ba ka tnad hi ka kwah ban pyntikna ba ka um kaba poi sha ki paidbah kadei ban long kaba khuid hynrei kata pat ka lah ban long tang lada la lah ban bujli noh ïa ki CI Pipe da ki DI Pipe ha ka Phase – III jong katei ka projek. La pyntip ruh ba ka jingpynïaid ïa ki pipe naduh Mawphlang shaduh 6 Mer bad 4 Mer Shiteng, Upper Shillong ka la jan dep hynrei ka kam ka la sahkut noh hapdeng ka surok Umshyrpi kaba dei ka Gravity Feeder Main jong ka Mawlai Nongkwar tang namar ba ki shipai ki pat ai jingbit ban pynïaid ïa ki pipe.
La ïathuh ruh ba ïa ka Gravity Feeder Main ban poi sha Nongmensong bad Pynthorumkhrah ruh ka sahkut noh hapdeng ka Polo bad MES Hospital namar ki shipai kim pat ai jingbit ban shah pynïaid ïa ki pipe. Hynrei la ïathuh pat ba ka Gravity Feeder Main ban poi sha Nongthymmai Rerservior ha Lawjynriew ka la dep bad sah sa tang ban pyntreikam noh.
Ha katei ka sngi, u Bah Sunn u la ïathuh ruh ba u la dep ruh ban pynsngew ha Ïing Dorbar haba ïadei bad katei ka jingpynïaid ïa ki pipe, hynrei na ka liang u Symbud Myntri Rangbah ba dei peit ïa ka tnad PWD, Bah Prestone Tynsong u la kular ba ka tnad PWD kan ym pynwit lada ki kam ki dei na ka bynta ka jingmyntoi jong ki paidbah. Hynrei na ka liang u CE pat haba kynthoh halor katei ka bynta u la ong ba haduh mynta ka jingpynpoi ïa ki pipe ban pynpoi um (distribution network) ym pat lah satia ban bteng biang. Halor kane ruh u ong ba shen hi un sa thoh sha u Myntri Rangbah ka Jylla, Conrad K Sangma ban tuklar noh kham kloi.
Na ka liang u MLA u la ong ruh ba jin lada ki ophisar ki la syllok ne pan lang ki jingïarap na u ym kum u CE ba la shong thai thynrei kum u nongmihkhmat ka thaiñ, ka Department ka la lah ban weng bun ki jingeh. U la ong ruh ba ka tnad lada dei ba ka syllok lang, lehse ka la lah ban weng wat ïa ki jingeh ba ka kynduh haba pynïaid ïa ki pipe na ki jaka paidbah ha Mawreng.
Na ka liang jong u MLA, nalor ba u ai jingmut ïa ki ophisar, u la kyntu ruh ïa ki ba lada ki don kino kino ki jingeh kim dei satia ban sngew lehraiñ hynrei ba kin wan shakhmat ban ïa syllok lang khnang ba yn lah ban pynjanai ïa kajingshakri ïa ki paidbah.
Ha kane ka sngi ki ophisar ba don lang ki kynthup naduh u Bah D War, Additional CE, Bah C Marngar, SE, PHE Electrical Shillong, Bah BK Lawai, EE Electrical Division Mawphlang, Kong S Pyrtuh, SDO Electrical Sub Division, kumjuh ruh ki Khileh Nongsynshar na ka Hima Mawphlang bad Elaka Laitkroh.