Press "Enter" to skip to content

Dawa ka Congress ban tohkit halor ka jingpyntreikam ïa ki skhim ha Jylla

Shillong, Nohprah 02: Ka Congress ba don ha Liang Pyrshah ha Ïingdorbar Thaw Aiñ, ban thung ïa ka jingtohkit da ka kynhun ba laitluid, ka ban tohkit ïa ka jingkynnoh pyndonkamkam bakla ki Minister (Political Executive) ïa ki skhim ba Sorkar khamtam haba ïadei bad ka jingpyntreikam ïa ka Saubhagya Scheme hapoh Jylla Meghalaya.
“Ka rukom pyntreikam ïa ki skhim hangne ka donkam ban pynlong noh da ka jingtohkit ba laitluid ban pynthikna ïa ka jingthmu bymman jong ki Minister ka Sorkar Jylla, ban pyndonkam bakla ïaki skhim sorkar tang ban pynhun ïa ka jingkwah rhah ïalade khlem da kheiñ ïa u paidbah bad ka Jylla” ong u Nongaiktien ka Congress Bah Himalaya M Shangpliang ha ka kyrwoh ba phah hynne ka sngi U Blei.
Kane ka jingkynthoh u Bah Himalaya kala mih ruh hadien ka jingpynkynriah kam syndet syndet ïa u Additional Chief Secretary Bah P.S Thangkhiew kum u Chairman ka Meghalaya Energy Corporation Limited (MeECL).
Haba kynthoh ba kane ka jingialehkai kum ka Miaw bad ka Khnai kala kylla long ka kam bym lah ïaid kiar ha ka synshar khadar ha Jylla Meghalaya, u Bah Himalaya ula ong ba la dei mynta ban buh noh da u pud. Kat kum ka jingong jong u, ka Sorkar Jylla kam lah ban shu kheiñ dewthala ïa ka jingkhmih lynti jong ki Longïing ba duk ba raitoi ïa ka roi ka par bad ban ïoh ïa ka bording elektrik ha ki Shnong Nongkyndong.
Haba pynpaw ïa ka jingbym lah ban sngewthuh bad jingbym lah ban ïaishah ïa ka jingshisha haba phai sha ka jingpyntreikam ïa ka Saubhagya Scheme ha Meghalaya kaba la paw pyrthei mynta, u Bah Himalaya ula ong ba ka jingkylli ka mih ba kumno la shu ialehkai ïa ka lawei jong ki hajar ngut kiba ap ïa ki kam pynroi ha ki shnong Nyngkyndong ka Jylla Meghalaya? Kat kum ka jingong jong u, ki kyndon pyntreikam ïa ka Saubhagya Scheme bala pynmih da ka Sorkar Pdeng ,kala buh ïa ka por ba khatduh ban phah pyntrei ïa ki skhim ha ka 31 tarik Nohprah 2017 bad kala buhpor ruh ba dei ban pyndep ïa ki project ha ka 31 tarik Nohprah mynta u snem. Hynrei, une u nongïalam ka Congress ula ong ba ka Jylla Meghalaya ka dang pynmih ïa ka tender jong ki project dang ha ka 26 tarik Nailur 2018, kaba la shimpor da ki bnai ban leh ïa kaba ym lah satia ban ngeit.
U Bah Himalaya Shangpliang ba ka jingpynmih tender naduh ka sngi ba nyngkong kala don ha ka kynrum kynram da ki jing kynnoh ba la ïaid lait na ka rukom khot tender haba shit ba shai, kaba phalang ïa ka jingthmu leh sopsop na sha lyndet.
“Ki kyndon jong ka tender kila bun shaba palat haduh ba ym don shuh ki Contractor na Jylla kiba lah ban ïakhun ïa ka tender bad ka por bala ai ban thep tender ruh ïa kane ka project kaba kongsan bha, ka long tang 8 sngi” ong u Bah Himalaya haba bynrap ba watla ka Sorkar kala pynjlan ïa ka sngi ba khatduh, hynrei ki kyndon ban thep tender ruh kila pynshaiong namar la i kumba la thaw ïa ki tang ban nym ai jaka ïa baroh hynrei tang ïa ki katto katne ki Contractor kiba la paw kyrteng bad shah thoh ha ki kot khubor.
Haba kren shaphang ka writ petition bala mudui hapoh ka Ïingkashari Meghalaya High Court da ki Contractor ba bitar ïa kane ka jingleh ka Sorkar, u Bah Himalaya ula ong ba ka Sorkar ka dang bteng ban ïasaid ba ki kyndon ki dei kiba donkam ban lah pyndep ïa ki project ha ka por kaba la buh watla dalade kala pynslem jan shisnem ban khot ïa ka tender ha kaba ka Ingkasharri ruh kala pyn mih ïa ka hukum ban pynsangeh noh ïa ka jingbishar ïa ki tender namar ka jingmih ki jingkynnoh ba hap ban tuklar.
Ha kane ka writ petition kaba dawa ban pynduh pyndam ïa ka tender bad ban pynlong ïa ka jigntohkit halor ki jingleh bymhok ha lyndet ka jingai tender, u Bah Himalaya ula pynpaw ïa ka jinglyngngoh ba ka Sorkar kala buh ka jingkyrpad hakhmat ka Ïingkashari ba kan shah ïa ka ha kaban weng bad pynduh pyndam noh ïa ka tender. Ula ong ba kaba lyngngoh shuh shuh ka long ba ha ka sngi ba ka Kashari kan ai ka jingmynjur ïa kane ka jingkyrpad, ki nongmudui ïa ka writ petition kila weng noh ïa ka mudui jong ki, kaba ailad ïa ka Sorkar ban lait na ka jingpynduh pyndam ïa ka tender.
“Khlem da ai satia ïaki daw ban weng noh ïa ka mudui, kam long satia kaba shitom ban sngewthuh ba ka lah ban don ki bor na shabar lane ka jingpynbor ha lyndet kane ka jingweng kynsan kynsan ïa ka mudui” ong u Bah Himalaya.
Une u Nongïalam ka Congress u ong ba kane ka khana ba khyllah kam shym la kut tang hangne haba kdew ruh ba tang ha ka shimiet, u Lat ka Jylla ula pynmih ïa ka jingpynbna ha ka 28 tarik Naiwieng, ba pyllait noh ïa u Bah PS Thangkhiew, Additional Chief Secretary bad Chairman ka MeECL na ka Ophis jong u kum u Chairman.