Press "Enter" to skip to content

Hadien 4 snem ka jingïakhun, yn ïoh surok rong ki shnong ka khappud East Jaiñtia

Shillong, Nohprah, 02: Ki shnong bapher bapher jong ka East Jaiñtia Hills kiba don ha ka khappud bad ka ri Bangladesh shen kin sa ïoh noh da ka surok rong kaba bha bad kaba jlih da ka jingtuklar jong ka Ingshari Meghalaya High Court.
“Ngi la sdang ban ïakhun naduh u snem 2014,” ong u Bah Kynjaimon Amse u nongïalam jong ki Waheh Shnong bapher bapher ka East Jaiñtia Hills haba ïathuh ba ka Ingbishar ka la bishar ïa ka jingud jingnam jong ki nongïalam shnong halor ka jingjot rathai jong ki surok ha ki shnong khappud ka East Jaiñtia Hills District naduh ka 28 tarik u bnai baladep ha kaba ka Iingbishar ka la pynpaw ïa ka jingbym sngewtynnat halor ka jinglong jingman jong kine ki surok kiba ktah ruh ïa ka jingim ba manla ka sngi jong ki paidbah.
“Namar ka jingdonkam kyrkieh, ka Ingbishar ka la shong bishar ïa kane ka kam ha ka 29 tarik u bnai baladep bad bthah ruh u Secretary ka PWD(R) bad ïa u Chief Engineer (NH), PWD(R) ba kin wan hajir dalade hakhmat ka Ingbishar. Ha ka 29 u bnai baladep, nga la leit mih hakhma tka Division Bench jong ka Iingbsihar High Court bad nga la pyntip ïa ki jingeh ba sangsot ba la mad da ki paidbah kiba shong basah ha ki shnong khappud,” ong u Bah Kynjaimon Amse ha u kyrwoh ba la phah mynta ka sngi.
“Hadien ba la bishar ïa ki arliang mamla, ka Iingbishar High Court ka la thaw ïa ka High Level Committee ba la khlieh da u Chief Secretary ka Sorkar Jylla ban pynthikhna ba dei ban shna noh mardor ïa ka surok kaba pynïasoh sha ki shnong kiba kynthup ïa ka shnong Hingaria, Huroi, Lahaleiñ bad Lejri hapoh khyndiat bnai. Ka Sorkar Jylla ka la pynpaw hakhmat ka Iingbishar ba kan pynkhreh noh mardor ïa ka Detailed Project Report (DPR) na ka bynta ban shna ïa ka surok Sonapur-Borkhar hapoh shi taiew bad ban phah ruh ïa ka DPR sha ki bor ba dei peit na ka bynta ban ïoh jingmynjur. Ka Iingbishar ka la buh sngi ban shong bishar biang ïa knae ka kam ha ka 17 tarik mynta u bnai Nohprah, shwa ban pynmih pat ïa kano kano ka hukum.
“Ngi sngewnguh shikatdei eh ïa ka jingtuklar jong ka Iingbishar High Court bad shen ngin sa ïoh ban ïaid ha ki surok kiba bha ha ki shnong nongkyndong. Ka jingïakhun jong ngi ka long ban ïohi ba ka jingim jong ki paidbah kiba shong basah ha khapud kan bit kan biang,” ong u Bah Kynjaimon.
Une u rangbah bad ka kynhun, ki la pynpaw ka jingsngewnguh ïa u Bah Ribor Shylla, u nongtrei monsngewbha ha East Jaiñtia Hills , u Bah S Pdang, Kong E Nongtdu, Bah D. Pachiang, Bah E. Mynso, Bah Raja Suchen u Secretary ka shnong Huroi bad i Kong R. Chullai kiba don bynta ban ai lem ïa ka kti ka mon.