Press "Enter" to skip to content

Hukum tohkit u Addl.DGP ba kynshoit um ïaka blei durga

Jowai, Nohprah 02: Ka ïingbishar ba don burom Meghalaya High Court kala hukum ïa u Addl. DGP, CID Headquarter ban tohkit halor ka jingkynnoh ïa u Deputy Commissioner jong ka East Jaiñtia Hills ba um shah ban pynngam um ïa ka blei Durga ha kawei ka Wah ha ka District bad ban ai ka kaiphod jong ka jingtohkit hapoh shitaiew.
Ka ïingbishar kaba la shongbishar ïaka mukotduma WP (C) 335 jong u snem 2018 kaba la ujor da u Salong Byrmein bad kiwei kiwei ha u Naiwieng 30, 2018 kala ai bor ruh ïa u Addl. DGP, CID Headquarter ban thung ïa u officer haka kyrdan Deputy Superintendent of Police u bym shahliang ne don liang ban pynlong ka jingtohkit da kaba khuid ba suba.
Shuh shuh u Addl. AG ula ai jingpynshai halor ka mukotduma MC[WP(C)]. No. 242/2018 ba ka PWD ka la long kaba la kreh bad kloi ban shna ïaka surok ban poi sha Shiv Mandir, Durga Mandir bad Bishari Mandir hynrei ki donkam katto katne por.
Katkum ka hukum jong u bnai Naiwieng 15, 2018 ka Court kala dep ai por shi bnai bad mynta la ai por sa 15 sngi bad baka PWD kam dei shuh ban pan por bad ka dei ban pyndep ïaka jingshna surok hapoh 45 sngi ban poi sha ki temple, ong ka ïingbsishar.
Ka mat kaba ar ba U Addl. AG ula pynshai ha khmat ka ïing bishar, ka dei halor ka hukum kaba ïadei bad ka kamra ne ka ïing ba shna da ka PWD ha Nartiang Temple ha kaba la pynshai ba kam don ka ïing ne kamra ba shna ka PWD ha phyllaw jong ka temple ha Nartiang.
Ha kane ka jingbishar u DC East Jaiñtia Hills ula wan hajir ha ïing bishar bad shipor um donkam ban wan hajir hakhmat ka ïing bishar.
Kumban shu pynkynmaw baka ïingbishar haka 15 tarik u Naiwieng 18 kala ïoh ka jingujor na u nongsaid aiñ uba kyrteng u S. Dey uba la ujor ha ka Court ba ha kane ka Durga Puja ba dang shu dep u Deputy Commissioner jong ka East Jaiñtia Hills u khlem shah ban pynngam ïa ka blei Durga bad ha ka jing bymbanse la pynbor ïa ka Puja Komiti ban shu sait noh ïa blei Durga da ka um bala kynshoit da ka Fire Brigade.