Press "Enter" to skip to content

Kyndit shuwa ban kylla Bangalaya ka Meghalaya

Shillong, Nohprah 02: Ka kynhun Hynniewtrep National Liberation Council (HNLC) hynne ka sngi kala kyntu ïa baroh ki Nongia lam saiñ pyrthei kynthup u Myntri Rangbah ka Jylla Conrad Kongkal Sangma, ba kin kyndit noh na ka jingïohthiah lyngngai shuwa ba ka Jylla Meghalaya kan ïoh ïa ka kyrteng ba thymmai ka ‘Bangalaya”.
Ka HNLC ha ka kyrwoh bala phah da u Bah Sainkupar Nongtraw, General Secretary cum Publicity Secretary, kala ther tyngeh ïa ka Sorkar Jylla namar ka jingbym lah ban shim ïa ki sienjam kiba tyngeh ban tehlakam ïa ka jingeh ba mih na ka jingrung kyrthep ki Bar Jylla bad ki Mynder Ri hapoh ka Jylla wat hapdeng ka jingdawa jong ki 13 tylli ki Sengbhalang ban pynieng noh mardor ïa ki khyrdop Entry/Exit Point hapoh ka Jylla.
“Ngi don ka jingkyrmen ba kane ka Sorkar ba mynta hapoh ka jingïalam u Conrad Sangma, kan lah ban pynurlong ïa ka jing dawa jong ki kynhun Sengbhalang hynrei sngewsih ba ym shym la ïohi dak satia ba kan ïaid shakhmat” ong u Bah Sainkupar.
Une u Nongïalam ka HNLC ula maham ba lada ka Jylla kam lah pynieng noh kloi ïa ki khyrdop Entry/Exit Point, ka Meghalaya kan sa kylla long kum kawei pat ka Tripura kaba shlei da ki mynder ri ki ban sa pynkylla rit paid ïa ki Jaidbynriew riewlum ka Jylla.
U Bah Sainkupar u ong ba u Myntri Rangbah ka Jylla u dei ban ïohi jngai bad ban shim ïa ka sienjam kaba tyngeh ban iada ïa ka khyndew bad ka jingithuh ba kyrpang jong ki paid nongshongshnong ka Jylla haba bynrap ba lada kane ka jingrung ki mynder ka dang bteng kumne kumba long mynta, ym slem ba ngin ïohi ïa ki mynder ri kat shaba don la ha Ïingdorbar Thaw Aiñ ka Jylla, ka Secretariat, ki kam business bad kiwei kiwei.
‘Kala dei ka por ba ki riew saiñ pyrthei jong ngi kin kyndit noh na ka jingïohthiah lyngngai shuwa ba ka Jylla kan ïoh kyrteng thymmai da ka ‘Bangalaya” ong u Bah Sainkupar.