Press "Enter" to skip to content

Kynnoh ba bthah u Acting Syiem ïa ki dukan Langpih ban ym siew bai musur

Ïa pyni bor kam synshar ha Hima khappud Assam

Nongstoiñ, Nohprah 2: U Bah Phlowing Syiem Nongbah Acting Syiem ka Hima Nongmynsaw Syiemm-ship kaba la ju tip baroh shikatta kum ka Raidmynsaw Sirdarship, u la pynmih ïa ka jingpynbna bad pyntip da ka jingthoh sha baroh ki nongshong dukan ha ïew Langpih ba kim dei shuh ban siew ïa ka bai musur ha kino kino ki nongkhrong musur ki bym shym la ai jingbit da u Acting Syiem.
Naduh ba la pynmih ïa katei ka jingpynbna haduh ka sngi thohdieng jong ka taïew ba la dep kaba dei ka sngi ïew Langpih, u Bah P.Snaitang u nongkhrong ïa ka jingkhrong bai musur na ki nongshong dukan ha katei ka ïew u dang bteng khrong bad u dei u nongkhrong musur u ba la ai jingbit da ka ka Raidmynsaw Sirdarship. Hynrei na ka liang ki briew kiba la ai jingbit da u Acting Syiem Nongmynsaw, kim shym pat la sdang satïa ban khrong bai musur.
Ki katto katne ngut riew rangbah katei ka thaiñ haba pyntip halor kane, ki la kam ruh ba naduh katei ka tarik ba u Acting Syiem u la pynmih ïa katei ka jingpynbna, na ka liang ki briew jong ka Raidmynsaw ki la peitngor bha na ka bynta ban ym ailad ïa kino kino ki briew kiba u Acting Syiem Nongmynsaw u la aibor ban khrong ïa ka bai musur. Nalorkata, la ong ruh ba lada ki lap ba ki don ki briew jong u Acting Syiem kiba khrong musur kin beh krad ïa ki bad lada ki pyneh kim banse ban pynsangeh da ka bor.
Halor kane ka kam, kitei ki riew rangbah ka Raidmynsaw ki la leit ban ïakynduh ïa u Deputy Commissioner ka West Khasi Hills bad ki la ai ruh da ka jingthoh da kaba ai kopi ruh ïa katei ka jingpynbna jong u Acting Syiem ka Nongmynsw Syiemship ba utei u Khlieh ka District un tip bad leh ïa kaba donkam.
Ha katei kajuh ka sngi, kitei ki rangbah ki la leit ban ïakynduh ruh ïa u Superintendent of Police bad ai ruh da ka jingthoh bad ka kopi ïa ka jingpynbna jong u Acting Syiem khnang ba un leh ïa kaba don kam lada jia kano kano ka jingkhrong musur jubor jong ki briew u Acting Syiem Nongmynsaw.
Ban pynneh ïa ka shongsuk shongsaiñ ha katei ka jaka, ki la kyrpad ruh ïa u Deputy Comissioner bad u Superintendent ki pulit ba kin ïatreilang na ka bynta ban teh lakam ïa ka shongsuk shongsaiñ. Ki la ong ruh ba katei ka jingpynbna jong u ka long katkum ka hukum ba la bthah da ka Khasi Hills Autonomous District Council lyngba ki kyndon jong ka Establishment management and control of market Regulation 1979.
Ki la kam ruh ba ïa ka ïew Langpih la pynlong da ki paidbah katei ka thaiñ naduh ki snem 1965 ha kawei ka jaka kaba la kam trai da ki Nepali ha kine ki sngi bad ha u snem 1970, la pynkynriah noh ha ka jaka ba don ka ktem pulit Assam haduh mynta. Hadien nangta la pynkynriah noh ha ka jaka ba ka long haduh kine ki sngi bad na ka liang ki nongsynshar ka Raidmynsaw bad ki paidbah nongseng jong katei ka ïew kim pat aiti ha ka Khasi Hills Autonomous District Council lane phah pynskhem ha ka.
Katba nang mih ki snem la nang pynkhlaiñ ïa katei ka ïew bad ïa ka jingmih la pyndonkam na ka bynta ki jinglut jingsep hapoh ka Raid bad la bhah kyrpang kumba 10 % na ka bynta ka Upper Primary School ba ka Raid ka la seng naduh u snem 1972. Mynta ka Raid ka la lah ban kyntiew kyrdan ïa katei ka skul sha ka Secondary School. Nangta Ïa ka market Complex kaba don ha katei ka ïew kaba la ïoh jingïarap na ka sorkar ha u snem 2012 na u DC ka West Khasi Hills ruh, la pyntreikam lyngba ka kyrteng jong ka Raidmynsaw.