Press "Enter" to skip to content

Kynnoh ka HNLC ba kynshoit ki Pulit ban thombor ïa i Kong Agnes bad Amita Sangma

Shillong, Nohprah 02: Ka kynhun Hynniewtrep National Liberation Council (HNLC) hynne ka sngi kala kynnoh ba dei ki Pulit kiba ‘kynshoit’ ban thombor bad pyrshang pynïap ïa ka Nongïalam CSWO Kong Agnes Kharshïing bad ka Amita Sangma haba dawa ruh ba dei ban weng noh ïa ka jingkhang tih dewiong hapoh ka Jylla.
“Ka Kong Agnes ka dei ka lanot bad shah pynlong langknia. Ka dei ka Tnad Pulit kaba kynshoit ïa ki paidbah ban shoh ïa ka namar ba ka pyrshang ban peitngor ïa ka jingtih be-aiñ ïa u dewiong” ong u Bah Sainkupar Nongtraw, General Secretary-cum Publiciti Secretary ka HNLC ha ka kyrwoh.
I Kong Agnes Kharshïing bad ka Amita Sangma kila mynsaw jur ha ka jingshah hiarthma ha ka kynhun ki suba mafia dewiong ha Tuber Sohshrieh, East Jaiñtia Hills, kaba lajia ha ka 8 tarik Naiwieng tang khyndiat por ba ki shondur ïa ki trok kit dewiong. U Bah Sainkupar ha ka kyrwoh, ula kynnoh ba baroh ha Jylla ki tip bha ba ka jingtih be-aiñ ïa u dewiong ka dei kaba la donkti lang naduh ki Nongkhaii dewiong, ki Pulit, ki riew saiñ hima bad ki Ophisar.
Ka dei naduh u snem 2014 ba ka National Green Tribunal (NGT) kala pynjari ïa ka hukum ba khang ïa ka jingtih dewiong thliew khnai hapoh ka Jylla Meghalaya.
Une u Nongïalam ka HNLC ula ong ba ka jingkhang ïa ka jingtih dewiong thliew khnai kan wanrah ïa ka jingduh, jinghiar ka kamai ka kajuh bad ka jingïapait ïapra hapdeng ki paid nongshongshnong bad kan pynbor ruh ïa ki ban shim ïa ka aiñ hala ki jong ki kti. U ong ba da ki hajar ki longïing kila mad ïa ka jingjynjar na ka jingkhang tihdewiong ka ban sa dap mynta 6 snem ha u snem ban wan.
“Lada ka NGT ka don ïa ka bor ban khang ïa kane ka kam, ka dei ruh ban don ïa ka bor ban plie ïa ki lad aikam aijam na ka bynta ki longïing ba duk” ong u Bah Sainkupar haba bynrap “Ban shu knieh ïa ka kamai jakpoh kam dei kaba suk hynrei ban pynim ja ïa ki longïing ba duk ka dei kaba jynjar bha. Haba u briew u ïohi ïa ki Khun ba ki thngan, yn nym pyrkhat iano iano ruh hynrei tangban ai bam ïa une u Khun la ka dei da ka lynti kaba dei ne ba be-aiñ”.
Haba kdew ba ka Jylla ka dei kaba don kyrhai ka spah ha ki kam jngohkai, une u Nongïalam ka HNLC ula ther tyngeh ïa ka Tnad Tourism kaba treikam kum ka mattah.
Ha kajuh ka por, ka HNLC kala dawa ïa ka Sorkar Jylla ban pynthikna ba dei ban weng noh ïa ka jingkhang tih dewiong haba pyrkhat lang na ka bynta ki longïing ba duk kiba shaniah tylli na ka kam khaii dewiong. U ong ba ka jingkhang tih dewiong kan nym ktah satia ïa ki Hehspah hynrei kala long ka jingphohsniew kynsha ïa kiba duk haba bynrap ba da ki spah ngut ki Khynnah skul kila hap pep skul bad da ki hajar ngut ki briew kim shym la lah ban pyndap bam ïalade lane ki Khun ki Kti jong ki.
Haba kheiñ ïa kane ka jinglong jingman ba mynta kum ka jingleh bymhok bad ka jinglong kamkai ka bor ka Jylla bad ki paidbah, u Bah Sainkupar u ong ba manla ka miet, ki Nong India ki tip ba ka India kala ïoh ïa ka jinglaitluid hynrei ki Jylla pat ki shu shaniah tylli ha ka jingsynshar donbor jong ka Sorkar Pdeng. “Katba ka Sorkar Pdeng ka dang kwah ba ki Jylla kin treikam kum ki tyngshop ba shah khyrwait shabi, ngin nym ïohi satia ïa ki jingkylla”ula ong haba bynrap ba ka Jylla Meghalaya kala sakhi ïa shibun ki jingshah thombor ha ka synshar khadar bad shah iuhroit ha ka kamai ka kajuh ha ka kti jong ka Sorkar India.
U ong, ki Jylla ka Ri India kim don satia ïa ka bor ban tyrwa ïa kano kano ka Amendment bad ki hap ban shaniah beit ha ka jingisynei jong ka Ïingdorbar Parliament. U ong ba wat ki Lat ka Jylla ki dei tang ki agent jong ka Sorkar Pdeng bad kim lah satia ban trei kum ki Khlieh ka Jylla.