Press "Enter" to skip to content

Pynbna ka NPP Nongstoiñ ïa u Bah Apsharailang kum u kyrtong MDC

Nongstoiñ, Nohprah 2: Ha ka elekshon MLA 2018, ka NPP Nongstoiñ ka la sei da u Lyngdoh Hima ba la tip ruh kum u Lawmaker jong ka Hima Nongstoiñ, u Bah Macmillan Byrsat bad u la jop don burom bad long mynta u MLA jong ka Nongstoiñ Constituency. Mynta ka kynti, ka party NPP ka la sei sa da u Secretary jong ka Hima Nongstoiñ u Bah Apsharailang Syiem ban ïakhun ïa ka Elekshon MDC 2019 bad ka party ka kyrmen ba ma u ruh un jop don burom ïa ka Elekshon.
Ha ka jingïalang paidbah jong ka National People Party Nongstoiñ Block kaba la long ha ka sngi saitjaiñ ha Bishop Hall Nongstoiñ, da kawei ka sur ka la rai ban kyrshan borbah ïa u bah Apsharailang Syiem Secretary jong ka Hima Nongstoiñ.
Ha ka jingïalang ba la tuid da ki nongkitkam bapher bapher jong ki tnad bapher bapher ka party, u President jong ka Party u Bah Macmillan Byrsat MLA, u pynshai ïa ka rukom pynïaid jong ka Party ha kaba ïadei bad ka jingjied ïa ka kyrteng jong u Bah Apsharailang Syiem ban long u kyrtong ha kane ka Election MDC ka ban sa long shen. U la ong ruh ba barabor u MLA u dei ban long u hynmen bad u MDC un long u para ha ka kam. Ka jingïaleh pyrshah uwei ïa uwei pat la ju shem ba kin ïajot lang baroh ar ngut. U la ai khublei ïa ka kynhun kaba kyrpang kaba la jied ïa ka kyrteng jong u briew u ba biang ha ka kam u ba la long lypa u General Secretary jong ka Party hapoh ka Block.
Na ka liang u kyrtong Bah Apsharailang Syiem, haba kren ha ka jingïalang, u la ai khublei ïa ki Nongkitkam jong ka Party ha ki Unit bad ki Front Organisation jong ki Longkmie bad ki Samla kiba la pdiang sngewbha ïa ka jingtyrwa jong ka Committee. U la khot bad ïa wer ïa ki Dkhot bad ki Nongkitkam baroh, ba kumba ki la mynjur ïa ka kyrteng jong u, kin trei shitom ruh ban pynpoi sha ka thong. U ong ka Party ka pdiang kylluid ïa kito baroh kiba kwah ban wan pynïasoh thymmai, namar ki kamra hapoh ka NPP ki dang kylluid bad ki kam ki dang don kyrhai. U la kyntu ïa ki para dkhot ba kin trei ïa ka kam da ka jingsngewrit, khnang ba kan khring ïa kiwei pat ban ieit bad pdiang bad ïatreilang hapoh ka Party.