Press "Enter" to skip to content

Sha u PM yn phah dorkhas ka AJYWO halor ka CAB-2016

Shillong, Nohprah, 02: Ka All Jaiñtia Youth Welfare Organisation Central Body, kawei na ki sengbhalang jong ki samla na Ri Jaintia, ha ryngkhat bad ki samla pule, ka NESO, ka ieng pyrshah pyrshah jur ïa ka Citizenship Amendment Bill 2016 jong ka Sorkar India kaba kwah ban kdup nong India ïa ki kynhun jaidbynriew na ka kynhun niam Hindu,Sikh, Buddhist, Jain, Parsi bad Khristan kiba na Afghanistan, Bangladesh bad Pakistan ban long kum ki nong India.
“Ka AJYWO, ka ieng pyrshah jur ïa ka Citizenship Amendment Bill 2016 ba la tyrwa da ka Sorkar India, ha ka nongrim ba lada ka sorkar India kan ïoh pynlong aiñ ïa katei ka Bill, kan buh ïa ka jaidbynriew rit paid jong ngi ha ka jylla Meghalaya bad ka thaiñ Shatei lammihngi ka India ha ka jingma kaba khraw kiba lah ban shah tyllep ha ki jaidbynriew heh paid jong ka Ri India” ong u Bah M H Dkhar President, ka AJYWO Central Body.
“Kum ki trai ri trai muluk rit paid jong ka thainñ Shatei lammihngi jong ka Ri India, ngim lah ban len ba ka jaitbynriew trai ri trai muluk rit paid bapher bapher jong ngi ka don ha ka jingma kaba khraw mynta na ka jinglah ban shah tyllep ha ki jaidbynriew hehpaid. Ka nuksa ba shaikdar ha ka jingïadei bad kane ka jingma ka long na ka jylla Tripura ha kaba ka jaidbynriew trai ri trai muluk hangtei ka lah kylla rit paid ha la ka jong ka jylla (ri),” u la bynrap.
“Ka Ri India ka la don lypa jin haduh 1.3 Billon ngut tam ki nongshongshnong jong ka. Tang ïa kine ruh kam lah ban pyndap pynbiang, mynta ka khmied pynban ki khmat bad kner ki kti sha kiwei pat ki nongshnong jong kiwei pat ki ri. Don aiu sha lyndet jong kane, ngim sngewthuh shuh,” la kynthoh une u nongïalam ka Seng.
Ki jaibynriew trai ri trai muluk jong ka thaiñ Shatei Lammihngi ka India ki la don lypa ha ka jingma. Ngim ithuh ithaw shuh kiei kine ba ïa boi ha ka thaiñ, ym tip shuh la u dei u nong Bangladesh, ne nong Pakistan, ne nong Afghanistan. Ka kamram jong ka Sorkar ka dei ban ban khynra ïa ki mynder ri kiba lah ban don ha ka thaiñ Shatei lammihngi bad pynher krad ïa ki na ka thaiñ bad ka Ri India hynrei ym ban khroh pynban bad pynlong nong India ïa ki nongwei hangne, u la bynrap.
Ka AJYWO ka pyrshah jur ïa ka Citizenship (Amendment) Bill-2016 jong ka Sorkar India bad ka dawa na ka Sorkar India ban pyndam noh mardor ïa kane ka Bill bad shen ka seng kan sa phah da ka jingthoh sha u Myntri Rangbaduh ka ri u Narendra Modi bad u sha u Myntri ka tnat Kam Pohing ka ri, u Rajnath Singh, ban pynpaw ïa ka jingpyrshah jur ïa kane ka Citizenship (Ammendment) Bill jong ka India.