Press "Enter" to skip to content

Bthah ka CWE ïa ka health Deptt bad Social Welfare ban shimkhia ïa jingeh ki Kynthei

Shillong, Nohprah 03: Ka Committee on Women Empowerment (CWE) jongka Ïingdorbar Thaw Aiñ ka Jylla hynne kala bthah ïa ka Tnad ka Koit ka Khiah bad ka Social Welfare ba kin shimkhia ïa ki jingeh bapher bapher jong ki Kynthei hapoh ka Jylla.
Hadien ka jingïalang bad ki Heh Ophisar na kine ki artylli ki Tnad hynne ka sngi nyngkong, ka Chairperson ka CWE kaba dei ruh i MLA ka East Shillong Kong Ampareen Lyngdoh kala ong ba ka Committee ka la ïoh jingtip bad sngewkhia ba ki don shibun ki Kynthei kiba donkam jingiarap hapoh ka Jylla.
“Ngin sa pynbeit ryntih bha ïa ka kam ban pynthikna ba ka tnad ka Koit ka Khiah bad ka Social Welfare kin iatreilang kawei ha kaban leh eiei na ka bynta ki jingeh jong ki Kynthei” ong i Kong Ampareen haba ïakren bad ki Nongthoh khubor.
I Kong Ampareen ila ong ruh ba ka Committee kan sa ïakren ruh bad ka Tnad Labour haba ïadei bad ki Kynthei khamtam kito kiba trei bylla namar ba bun na ki kim ïoh satia ïa ki jingmyntoi haba ïoh khun rit.
Haba ong ba kane ka jingbym ïoh jingmyntoi kala jia wat hapdeng ka jingdon ki skhim, i Kong Ampareen ila ong ba ka don ka skhim kaba la pyntreikam beit thik ban pynthikna ba ki Kynthei ba trei bylla ki dei ban ïoh ïa ka bai bylla jongki haba ki ïohkhun rit.
“La pynsngewthuh ïa nga ba ki don katto katne ki jaka treikam kum ki University bad kiwei kiwei, ki bym shah ne ailad ïala ki nongtrei Kynthei ba kin shim shuti hynriew bnai ban sumar khun rit khlem ka jingsiew. Don ba ïathuh ha nga ba ki jaka pule ruh kim shym la leh ïa kane” ila ong haba bynrao ‘Kane ka dei ka jingpynkheiñ ïa ka hok ki Kynthei namar kine baroh ki dei kat kum ka hukum jong ka Ïingkashari Supreme Court kaba ki hap ban bud thik pa thik”.
Haba kren halor ki kam bymman pyrshah ïa ki Kynthei kynthup ka kam leh be-ijot, i Kong Ampareen i ong ba ka Committee ka ïohi ïa ka jingima ba ki Kynthei ki dang don hapdeng ki jingma ban ngat ha kine ki kam.
“Namar kata, kum ka Committee ngin shimkhia ïa kano kano ka jingthombor pyrshah ïa ki Kynthei bad ki Khynnah bad ngi don hangne ban leh eiei pyrshah ïa kine ki kam” ong i Kong Ampareen.
Haba pynpaw ïa ka jingsngewkhia ba bun ki Kynthei ba mad jingeh kim ju kham tip ïa u Helpline Number 181, i kong Ampareen ila ong ba ka Committee kala bthah ïa ka Tnad ba dei khmih ïa kane, ba ka dei ban buh ïa ka One Stop Crisis Centre bad ban pyntrei kam bha ruh ïa ka.
Ka Committee kala ai jingmut ruh ïa ka jingdonkam ban thaw sa artylli ki Shelter Home na ka bynta ki Kynthei ba mad ïa ki jing shah thombor, kawei ka Tura bad kawei ka Jowai.
Ha kawei pat ka liang, u Dkhot ka CWE bad MLA ka Mawsynram Bah Himalaya Shangpliang ula pyntip ba ka Committee kala bthah ruh ïa kaTnad Social Welfare ba kan wanrah ïa ki project ban ai jingiarap ïa ki Kynthei kiba shah khaii bad kiba la wanphai ban imlang ha ka imlang sahlang.