Press "Enter" to skip to content

Dawa ka FKJGP ïa ki Bor District ban tehlakam ïa ki dukan madan bad Nongkhrong

Shillong, Nohprah 03: Ka seng Federation of Khasi Jaiñtia &Garo People (FKJGP)-Sengkmie kala dawa ïa ki Bor District ka East Khasi Hills ba kin tehlakam ïa ka jingkharoi jong ki Bar Jylla ba shongdukan madan bad ki Nongkhrong ha Nongbah Shillong.
Ka FKJGP ka suba jur ruh ba ka jingkharoi jong ki Bar Jylla ba shong dukan madan khamtam ha Police Bazaar bad ki thaiñ GS Road, ka lah ban dei tang ka buit jong ki mahajon/nongkhaii, kiba pynkha ïa kine ki dukan ban lah die ïa ki mar ki mata kiba rim bad ki ba la sah snem khamtam ki jaiñ ki nep bad ki juti.
Ki Nongïalam ka FKJGP hapoh ka jignïalam u Publicity Secretary Bah Eldie Newton Lyngdoh, kila ïakynduh markhmat ïa u Deputy Commissioner ka District Bah P.S.Dkhar hynne ka sngi ban dawa ha kaban tehlakam noh mardor ïa ka jingnang kharoi ki dukan madan bad ki nongkhrong, kiba la pynthut bad pynwit shikatdei eh ïa ka ïaid ka ieng jong u paidbah ha jan baroh ki jaka iew ka Nongbah Shillong khamtam ha Khyndai Lad bad GS Road.
“Ngi lyngngoh ba katba nang mih ki sngi, nang kharoi ki Bar Jylla ba shong dukan madan. Ngim tip mano kine ki briew bad na ei ki wan mih kynsan kynsan haduh bala pynkhapngiah lut ïa ki lynti ki syngkien ïaid briew” ong u Bah Eldie haba pynpaw ruh ïa ka jinglyngngoh ban ïohi ïa ki dukan madan ha Khyndailad kiba la ïohlad ban kynton bad saphriang ïa ki jaiñ ki nep, ki juti ha ki lynti syngkien ïaid briew.
Kat kum ka jingong une u Nongïalam ka FKJGP “Lada shu peit ïa ki jaiñ ba kynton bad ba saphriang khamtam ha Khyndailad, ym idei shuh ban ong ba ki dei ki dukan madan jong kito ki briew ba shong ha kine ki dukan..Lada khmih bha ïa ki jaiñ ki nep ne Juti ruh ym idei ban ong ba ki dei ki mar second hand. Imat ka dei ka buit jong ki mahajon/nongkhaii dakaba buh ïala ki nongtrei ban die madan ïa ki mar kiba rim bad bala sah snem”.
U Bah Eldie u ong ba ki Bor District ki dei ban tohkit ban lap ïa ka jingshisha ïoh ka dei ka buit jong ki mahajon tangban lum spah haba buh hakhmat eh ïa ka jingsuk bad jingaram jong u paidbah nongleit nongwan bad u nongthied nongpet, uba la hap ban shu ïaphngiam para briew ban ïaid lynti ne ban rung sha ki dukan ba ki thmu thied jingthied.
Haba pynpaw ba don bun bah ruh ki trai ri trai muluk iba shong dukan madan namar ka jingkyrduh kam hynrei bun na kine ki dukan ki dei ba tang shipor (seasonal), u Bah Eldie ula ong “ Ki Khasi jong ngi ba shong dukan madan kim khlemakor ban pynsa phriang lut ïa ki mar ki mata jong ki sha ki lynti ïaid briew. Kane kam long kumta ïa ki Bar Jylla ki bym don ïa ka raiñ ka rem ne ka jing pyrkhat lang ïa ka jingsngew jong kiwei”.
Haba pyntip ba ka Seng kala ïohpdiang ïa bun ki jingujor ba ki Bar Jylla ba shong dukan madan ki ju mlien bha ban leh heh ïa ki trai shnong kiba ïaid lynti bad kumjuh ruh ïa ki trai ri trai muluk kiba die dukan madan lang khamtam ha Khyndailad, u Bah Eldie u la maham da kaba ong “Mynta kan dei ka sien ba khatduh ïa ki Bar Jylla ba kim bit ban leh baheh ïa ki trai shnong hangne ha Ri-lum Khasi Jaiñ.Lada ka Seng ka dang ïoh pdiang ïa ki jingujor, kan sa leh kat kaba shah ka kam”.
Ha kajuh ka por, u Bah Eldie u ïathuh ba ha ka jingïakynduh bad u Deputy Commissioner, ka Seng kala dawa ruh ïa une u Khlieh duh ka District ba un tuklar lang noh halor ka jingkharoi jong ki Nongkhrong hapoh ka Nongbah, kiba pynijli bad pynïap ïa ka nam jong ka Nongbah kum ka ‘Scotland of the East’.