Press "Enter" to skip to content

Hadien u heh FKJGP sa u GS barim ka KSU mih ïakhun MDC na ka Congress

Shillong: Hadien jong u Bah Marbud Dkhar, Chief Organiser ka FKJGP, mynta sa u General Secretary barim ka KSU, u Bah Auguster Jyrwa mynta u la mih ban ïakhun ïa ka elekshon MDC ban wan na ka Seng Congress.
U Bah Auguster, uba la shimti ïa ka kam General Secretary na u Bah Hamlet Dohling, un mih ban ïakhun ïa ka elekshon na Jaïaw Constituency. U Bah Marbud pat un ïakhun na Mawlai Constituency.
Ïa ka rai ban pynïeng ïa u Bah Auguster, la shim ïa ka jingïalang kaba la long pynlong lang da ka Shillong West Block Congress Committee bad ka Shillong North Block Congress Committee kaba la long ha ka 30 tarik u bnai baladep, ha kaba la ïadonlang u Bah Mohendro Rapsang, MLA ka Shillong West ryngkat ki nongkitkam jong baroh artylli ki Block bad na ki tnad treikam jong ki.
U Bah Auguster udei u pyrsa jong u (L) Bah Saiñ Manik Jyrwa, MDC barim jong ka Jaïaw Constituency bad u la shakri ruh bun snem kum u nongïalam jong ka Seng KSU.
Da ka jingmih u Bah Auguster, ka elekshon MDC ha Jaïaw kan itynnad bha, namar ba na ka liang ka KHNAM ruh la mih u Bah Thomas Passah, President ka KHNAM Youth Wing. Hynrei ka KHNAM ka la pait noh arliang ha kane ka Constituency hadien ba u Bah Adelbert Nongrum, MLA ka North Shllong, u la pynpaw ka jingbym hun ïa ka jingai ticket ïa u Bah Thomas bad kumba ka paw ruh, ka KHNAM u Bah Adelbert kadei kaba la ïoh jingithuh na ka Election Commission of India. Ym tip mynta pat u Bah Thomas un ïeng na ka Seng aiu.
Na ka liang ka Seng UDP, haduh mynta kam pat ai ïa ka rai, hynrei la sngewthuh ba ki don bun b ha kiba pan ticket, kynthup ruh ïa uwei na ki nongïalam ka FKJGP Central Body.