Press "Enter" to skip to content

Khang khyrdep ka Tnad Khlaw ia 6 tylli karkhana otdieng ba be-ain ha Garo

Tura, Nohprah 03: Ka Tnad Khlaw ka Jylla kala khang khyrdep haduh 6 tylli ki karkhana otdieng ba be-aiñ ha ka jingkhynra bala pynlong hynne ka sngi ryngkat bad ki bor District bad ki Pulit.
Ha kane ka jingkhynra, ka Tnad Khlaw kala kurup ruh ia baroh ki kor ot dieng bad ki dieng ba don ha kine ki karkhana. Kane ka jingkhynra ka dei kaba la pynlong da ka Special Task Force Committee ha ka thaiñ Chibinang kaba don ha Phulbari, kaba dei ruh ka ktem iakhaii tuh iaki dieng.
Kane ka kynhun khynra kala lap haduh 6 tylli ki karkhana ot dieng ha ki thaiñ Bhaitbari haduh Chibanang bad kila kurup nohia ki khurat otdieng, ki motor bad baroh ki tiar ba pyndonkam ha kine ki karkhana.
Ka tnad Khlaw kala pynlong ia kane ka jingkhynra hapoh ka thaiñ namar ka jingioh khubor halor ka jingdon ia palat 40 tylli kik karkhana otdieng bala seng ha ki iingbriew bad ki jaka kyndong da ki nongkhaii dieng tuh, kiba ju leit pom tuh ia ki dieng na ki Reserve Forest badon ha Ri-lum Garo.
Ka thaiñ Chibinang kala kylla long ka ktem ki kam khaii dieng tuh namar ba ka don ha khappud ba markhap bad ka Jylla Assam bad ki trok bym lah niew ki ju kit tuh ia ki dieng wat haba shit ba shai ban leit die sha Jylla Assam. Ka jingdon jong ka Forest Check Gate ka GHADC ruh kam shym la lah satia ban khang ia kane kakam bymman.
‘Ngi la khynra haduh 6 tylli ki karkhana otdieng ba be-aiñ ha ka thaiñ bakynthup ia ka Haribhanga, Bholarbhita, Katmil bad Ghumaijhora. Ngi la ioh kurup ia bun bah ki kor otdieng bad ki dieng na kine ki karkhana”ong ki Ophisar ka Tnad Khlaw.