Press "Enter" to skip to content

Pan jingkheiñ ka CWE ïa jingtreikam ki Maternity Ward ha ki Civil Hospital bad CHC

Ba dang bun ki Nongkha Khun ha Ïing
Shillong, Nohprah 03: Ka Committee on Women Empowerment (CWE) jong ka Ïingdorbar Thaw Aiñ ka Jylla, hynne ka sngi kala bthah ïa ka Tnad ka Koit ka Khiah ka Jylla ba kan aiti da ka kaiphod halor ka jinglong jingman bad ki jingtreikam jong ki Maternity Ward ha baroh ki Civil Hospital bad ki Community Health Centre (CHC) ha baroh kawei ka Jylla.
Ka Committee kala pan ïa kane ka kaiphod namar ka jingshem ba dang bun bah ki Kynthei ha kylleng ki District ka Jylla ki dang kha khun hala ki jong ki Ïing ki sem ym sha ki jaka sumar ka Sorkar.
Haba ïakren bad ki Nongthoh khubor hadien ka jingïalang
bad ki Ophisar ka Tnad ka Koit ka Khiah hynne ka sngi nyngkong, ka Chairperson ka Committee Kong Ampareen Lyngdoh, ila ong ‘Ngi la bthah ïa ka Tnad ka Koit ka Khiah ba kan lum jingkheiñ wut wut ïa ka jingdon bad jingtreikam jong ki Maternity Ward ha ki Civil Hospital bad CHC ha baroh ki District ka Jylla bad ban ai jingtip ïa ka jinglong jingman jong kine ki Ward ha baroh kine ki jaka sumar”.
Haba pynpaw ba ka Committee kala pyntip ruh sha ka Tnad ba ki dan gdon haduh 48.6 percent ki kynthei ba dang kha khun hala ki jongki Ïing ki sem ym ha ki jaka sumar, i Kong Ampareen ila ong ba ha kane ka spah snem ba arphew mynta, kane ka jingkheiñ ka long kaba ima bha.
I Kong Ampareen haba banjur ïa ka jingdonkam ban pynkupbor ïa ki Nongpynkha Khunlung hapoh ka Jylla, ila ong ba bun na ki Nongpynkha Khunlung kim don satia ïa ki tiar ki tar ban pynthikna ba ka jingpynkha Khunlung ha ki Ïing ki Sem ki long kiba shngaiñ bad ka bym buh ïa ka Kmie ha ka jingma ne ha ka jingpang jingshitom.
“Kaei kaba kham ima shuh shuh ka long ba bun na ki jingpynkha Khunlung ha Ïing ki ktah ïa ka koit ka khiah ki Khunlung namar ka jingsumar sukher ïa ki Khunlung ba dang kha ha kylleng ka Jylla ka dei ka kam kaba hap shimkhia bha. Ngi kum ka Com mittee ngi la shimkhia bha ïa kane ka kam” ong i Kong Ampareen.
Haba bynrap ïa kane, u Dkhot ka CWE uba dei ruh u MLA ka Mawsynram Bah Himalaya Shangpliang ula ong ba lah ban dei namar kane ka daw ba ka jingïap jong ki Kynthei ba kha Khunlung (Mother Maternity Rate) bad ka jingïap ki Khunlung ba dang shu kha (Infant Mortality Rate) kala jur bha hapoh ka Jylla.
U Bah Himalaya ula ai nuksa ba ki don haduh 16 ngut ki mynsiem ba ïap tang ha Pynursla CHC ha kine ki phra bnai bala leit noh bad ong ba ka Tnad ka Koit ka Khiah ka dei ban leh eiei bad pynthikna ha kaban pynduna ïa ka jingïap ki Kynthei ba kha Khun bad ki Khunlung ba dang kha.
Ha kawei pat ka liang, i Kong Ampareeen iba dei ruh i MLA ka Congress na East Shillong, ila ong ba ka Committee kala shim khia ruh ïa ka kam ba ïadei bad ki ASHA ki bym ju ïoh ïa ka jingsiew ba thikna.
I Kong Ampareen ila pyntip ba ka Committee kan sa pynlong ïa ka jingleit jurip ïa ka Ganesh Das Maternal & Child Health Hos pital ka Sorkar Jylla ban tohkit ruh ïa ki daw balei ba ym pat lah ban pyntrei ïa ka Building ba thymmai watla ïa ka pisa la dep ban pyllait naduh u snem 2012.
Nalor kane, ka Committee kala bthah ruh ïa ka Tnad ban pynlong ïa ka Audit jong baroh ki CHC bad PHC namar ka jingujor ba bun ki Doktor, ki Nos bad ki Nongtrei kim ju leit trei thikna. Ha kajuh ka por, la pyntip ba ka Committee kan sa pynlong ruh ïa ka Special Christmas Programme da kaba leit iuhkjat ha ka saw tylli ki jaka sumar ka Sorkar ba kynthup ïa ka Ganesh Das hospital, Jowai civil hospital, Resubelpara CHC bad Songsak PHC ha ka 13 bad 14 tarik u Nohprah.
“Kan dei ka jingleit iuhkhat ba kyrpang ha kaba ngin sa ai ïa ki jingai sngewbha sha ki Longkmie ba ïohkhun ha ki Maternity Ward ka ban long ruh kum ka thong ban pynsaphriang ïa ki jingtip sha ki paidbah ba ngi don ka Committee kaba treikam bha a ka bynta ban pynkupbor ïa ki Kynthei”ila ong.