Press "Enter" to skip to content

Shem jingeh ban pynbha ïa ka pule puthi, hynrei ngin ïakhun tyngeh: CM

Shillong: U Myntri Rangbah ka jylla, u Conrad Sangma, u la ong ba kadei ka thong kaba eh bha ban pynbha ïa ka pule puthi, hynrei ka sorkar kan ïakhun tyngeh ïa kane.
“Lymda ngi lah ban wanrah ïa ka pule puthi kaba bit kaba biang, ngin nym lah ban pynïaid shaphrang ïa ka jylla”, la ong u Conrad haba kren ha ka jingïalang rakhe Jubili Rupa jong ka Rev Thomas Jerman Jones Presbyterian School in Mawphlang ha ka sngi nyngkong.
“ Ki jingdonkam (infrastructure) ha ki skul jong ngi ki long kiba tlot bad kawei ka sorkar hadien kawei pat ka la pyrshang ban pynkhlaiñ, hynrei haduh mynta kine ki jingtlot ki dang don”, u la ong.
De namar kane ka daw, u la ong ba kane ka sorkar mynta ka la buh ïa ka pule puthi kum ka thong kaba hakhmat eh. U Myntri Rangbah, u kyrmen ruh ba lyngba ka Education Policy, ka sorkar kan pyrshang ban peit ïa kine ki jingeh kiba don mynta. Ha kane ka jingkren jong u, u la ïaroh ruh ïa kane ka skul, kaba la ai ka jinghikai ym tang ha ka liang ka jingnang jingstad ha ki kot, hynrei ka la shim ruh kaba hikai ban treikam (vocationional) ka rwai ka siaw(traditional music) bad ka jingïalehkai sports. “Kine kidei kiba ngi donkam bha ha ki skul ha kine ki sngi ba mynta”, la ong u Myntri Rangbah.
Ha kane ka jingïakhe la sam memento ruh sha ki nongseng jong ka skul ha ryngkat ka jingïadonlang u MLA ka Mawphlang, u Bah SK Sunn.