Press "Enter" to skip to content

Shen yn pynïasoh NPP u Bah Lapang

Nongpoh, Nohprah 03: Hadien ba u Dr. D.D Lapang u la phet noh na ka Party Congress kaba u la pynpaw ba u mih na ka jingkhanglad ka Congress ba un dang bteng ka jingshakri sha ki paidbah ha ka jinglong tymmen, ha kane ka kynti wat hapdeng ka jingnoh ka rta u la kular ban dang bteng ka jingshakri sha ki paidbah bad ka sur kaba jam ka la mih ba un bteng ka jingshakri da kaba un pyniasoh noh sha ka National People’s Party kaba don mynta ha ka liang synshar jong ka sorkar ha ka jylla.
Kumba la ioh lum jingtip da u Nongthoh khubor u Mawphor, la thikna ba u Dr, D.D Lapang un leit ban pynïasoh noh sha ka NPP ha ka 10 tarik u Nohprah ba la pynbeit ban pynlong ha Madan Umbuda, Nongpoh, ha kaba u Myntri Rangbah ka jylla, u Conrad K. Sangma un pdiang burom ïa u sha ka party bad ryngkat u Deputy Chief Minister, u Bah Prestone Tynsong bad kiwei kiwei ki heh nongïalam ka NPP na ka jylla.
La ioh jingtip ruh ba ha kane ka sngi ba u Dr. D.D Lapang ryngkat ki nongkyrshan bad kiba ieit ïa u kin pyniasoh noh sha ka NPP, u myntri Rangbah ka jylla un wan shim bynta da ka Helicopter (Chopper) kaba un hiar ha Madan Umbuda ban don ryngkat ha ka sngi ba la pyniasoh NPP u Dr. D.D Lapanga bad ki nongkyrshan jongu.
La thikna ruh ba ha katei ka sngi da ki hajar ki paidbah kin tuid ban sakhi lang ha kane kasngi ba u Dr. D.D Lapang un pyniasoh sha ka NPP bad lah ruh ban ong ba ka long ka jingioh bor ïa ka NPP ha Ri Bhoi bad kumjuh ha ka jylla hi baroh kawei ha kaba la paw ba u Dr. Lapang wat la u la don ha ka jingnoh ka rta hynrei kum u nongialam ba la paw kiba bun ki paidbah kin ia don lang bad u na ka bynta ban bteng ka jingshakri sha ki paidbah.
Ban pynkynmaw halor kane ka bynta ba u Dr. D.D Lapang un pyniasoh sha ka NPP kam dei tang ka rai jong u shimet, hynrei ka dei karai jong ki nongialam bad ki paidbah nongkyrshan jong u kaba ki la dep ban shim rai ha ka jingialang kaba dang long shen ha Nongpoh ba ki nongkyrshan ki la pynbor ïa u ban pyniasoh sha ka NPP na ka bynta ka jingshakri sha ki paidbah.