Press "Enter" to skip to content

Yn hiar ka KHADC bad CCIB sha Nongjri- Dawki ban tuklar jingker sainar shiah

Ba thmu pyntrei khlem da ïoh NoC
Shillong, Nohprah 03: U Chief Executive Member (CEM) ka KHADC, Bah HS Shylla ha ka Sngi Nyngkong u la kular ha ki nongïalam jong ka Coordination Committee on International Border (CCIB) ba ha ka 17tarik ka Council kan hiar sha Nongjri – Dawki ban leit jurip markhmat bad tuklar ruh halor ka jingthmu jong ka sorkar ban ïaid shakhmat ïa ka jingker sainar shiah ha shi lynter ka khappud ha katei ka thaiñ hapdeng ka jingpyrshah jong ki trai jaka.
Na ka liang u Chairman ka CCIB, Bah Suk-kynjai Myrchiang haba kren bad ki lad pathai khubor hadien ka jingkynduh u la ong, “Na ka liang u CEM u la kular ban leit jurip markhmat ha ka 17tarik mynta u bnai sha Nongjri bad Dawki ban ïohi da la ki jong ki khmat.” Nalorkata, ki la pynpaw ruh ïa ka jinglyngoh ba kumno ka sorkar jylla ka thmu ban ïaid shakhmat ïa ka jingker sainar shiah hapdeng ka jingpyrshah jong ka CCIB khamtam eh khlem ka No Objection Certificate (CCIB) na ka Council.
Na ka liang ka CCIB, ki pynpaw ruh ba naduh mynshwa haduh mynta ki ieng beit ha kajuh ka nongrim, kata ba ka jingker sainar shiah kadei ban long na ‘zero point’ hadien ba la pynbeit ïa u pud u sam.
Haba bynrap lang, u Secretary ka kynhun, Bah Kmen Myrchiang u la ong ba ka CCIB kaba dei ka kynhun jong ki trai jaka bad nongsynshar shnong ka pynpaw ruh ka jingsngewnguh halor ka sienjam da ka Council na ka bynta ban ïasaid na ka bynta katei ka jingeh jongki hadien ba ka MDC jong ka thaiñ Kong Grace Kharpuri ka la wanrah ïa katei ka mat ha ka Dorbar Tlang jong ka Council.
“Ngi sngewnguh ïa ka Council lyngba ka motion ba wanrah da ka nongmihkhmat jongngi, u CEM u la kular ban thoh sha ka sorkar pdeng ban phah tuklar ha ka United Nations Declaration on the Rights of Indigenous Peoples (UNDRIP) ban ïada ïa ka Jaidbynriew bad khyndew ka shyiap,” ong u Bah Kmen.
Halor ka jingkylli, utei u nongïalam ka kynhun u la ïathuh ruh ba ka kompeni ker sainar shiah kaba la ai sub-contract ïa ka kam, ka lasdang ban pynpoi i a ki tiar bad mait ïa ki khlaw na ka bynta ban ïaid shakhmat ïa ka kam.
Ki la ïathuh ruh ba katei ka jingdawa jong ki ba ka jingker sainar shiah kadei ban long na Zero Line ka long khnang ba ki paidbah ba sah ha khappud kin ym duh-ei ïa ka jaka khamtam eh ki jaka trei jaka ktah.