Press "Enter" to skip to content

Ai ksai u Myntri Tribal Affairs ban kyntiew noh ïa ka jingdon MDC ha ki ADC: Rymbai

Lah ban pynjlan ïa ka samoi ki ADC haduh 6 bnai

Jowai, Nohprah, 05: U Ma Madonbai Rymbai, Chief Executive Member jong ka Jaiñtia Hills Autonomous District Council (JHADC) ula ong ba u Jual Oram, Union Minister for Tribal Affairs jong ka Sorkar Kmie ula ai ksai ban pyntreikam noh ïaka jing kyntiew seat ha ki lai tylli ki Autonomous District Council (ADC) ka Jylla ba kynthup ïaka JHADC, KHADC bad GHADC.
U Ma Rymbai ula ong ba dangshen hadien ka dorbar tlang ka konsil kila ïakynduh ïa u Jual Oram haka 27 tarik haduh 30 tarik u Naiwieng 2018 ha Nongbah Delhi ryngkat bad ki MDC jong ka KHADC bad kiwei kiwei ki para dkhot jong ka JHADC ban ïakren halor ka jingpynkylla thymmai (Amendment) ïa ka Sixth Schedule jong ka Riti Synshar ka ri India.
“U Jual Oram haka jingïakren bad u; ula ksai ba khlem pep kin rah ïaka Amendment bill ha ïing dorbar thawaiñ (Lok Sabha) haka Dorbar Tlang haki tarik 10, 11 ne 12 Nohprah khnang ban ïoh ka jingmynjur hapoh ka ïing dorbar bad ba ki konsil kin ïoh ban kyntiew noh ïaka jinglong dkhot hapoh ka konsil”, la ong u Ma Madonbai Rymbai bad bynrap ruh ba ka sorkar pdeng kala bthah ïaka sorkar jylla ban pynkhreh ban pyntreikam noh ïaka jingkyntiew seat ha Garo Hills Autonomous District Councils (GHADC) bad ha Khasi Hills District Councils yn kyntiew na ka 30 sha ka 40 Seats ha kaba saw tylli ki Seat yn dei kiba shu sieh bad ar tylli na kine ki saw tylli yn mang kyrpang na ka bynta ki kynthei. Ha Jaiñtia Hills Autonomous District Council yn kyntiew ïa ki seat na ka 30 sha ka 34 Seat ha kaba ar tylli na ki saw tylli ki Seat yn dei kiba shu sieh katba ar tylli yn mang kyrpang na ka bynta ki kynthei. Shuh shuh u Ma Madonbai Rymbai ula ong ba lada ïoh ïaka jingmynjur halor kane ka Amendment jong ka Sixth Schedule wat ka samoi treikam jong ki konsil ruh lah ban pynjlan sa 6 bnai bad ka elekshon ka lah ban long hadien bala phiah ne delimitation ïa ki constituency.
Ka khubor ka Ïathuh shuh shuh ba lada ka parliament kan ai jingmynjur ïaka Amendment jong ka Sixth Schedule ka lah ruh ban wanrah jingkylla ha kaba yn pynkylla bad ban pynkup bor shuh shuh ïaki ADC da kaba pynkylla sha ki Territorial Council ka ban ïoh shuh shuh bun ki subject bad kane ruh ka rai ba khatduh kan shong haka Sorkar Jylla. Ha kaba ïadei bad kiwei kiwei ki jingïarap ne ka bhah na ka NITI Aayog U CEM JHADC ula ong ba kila pyrshang ban ïakren ban kyntiew ïaka bhah jong ka JHADC bad ka NITI Ayog kala kular ruh ban pynïoh ka song jingïarap ïa ka konsil kaba tip kum ka Special Central Assistant Grant.