Press "Enter" to skip to content

Hadien 12 snem ba ieh ïingjah, sdang treikam ka Nongur PHC

Shillong, Nohprah 05 : Ki arngut ki Myntri Sorkar ka Jylla, kynthup ïa u Myntri ka tnad ka Koit ka Khiah, Bah AL Hek bad u Myntri ka tnad PHE, Bah Samlin Malngiang ki la kyntu jur ïa ki paidbah ba kin pdiang ïa ki jingai jingsumar bapher bapher khamtam ki injek kiba ïadei bad ki khunlung.
Katei ka jingkyntu jong kitei ki Myntri kadei hadien ba u Deputy Comissioner ka East Khasi Hills dang shen u la pynbna ba ka jingai injek Measles Rubella ha ka distrik ka long kaba duna haduh katta katta.
Na ka liang u Myntri ka tnad ka Koit ka Khiah haba kren kum u Kongsan ha ka jingïalang plie ïa ka Primary Health Centre ha Nongur-Weilyngkut, Sohiong, u la ong ba ka Koit ka Khiah kadei ka spah kumta kan long lehnohei ka jinglum spah lada ym don ïa ka jingkoit jingkhiah.
“Ki injek dawai ki wanrah ïa ka koit ka khiah na ka bynta ki khun jong phi bad na ka Department ruh ngi kwah ba phin koit phin khiah. Ka jingwan jong kane ka PHC ruh kan pynsuk ïa phi namar kin don naduh ki doktor bad ki nos ban sumar ïa phi. Kumta nga kyntu ïa phi ba phin treilang bad ki ha ki prokram bapher bapher,” ong u Myntri haba kren kum u Kongsan ha katei ka sngi.
Shuh shuh u la ong ruh ba ka sorkar kam ai tang ki doktor ne ki nos ha ki CHC ne PHC hynrei mynta lyngba ka MHIS ka la ai ruh sa ka bai eksamin na ka bynta ki jingpang bapher bapher. “Mynshwa ha ka MHIS ki khlem kynthup ïa ka bai eksamin hynrei mynta la kynthup lang baroh,” u la ong da kaba bynrap ba naduh u Rymphang katei ka skim kan sdang ban treikam biang ha baroh kawei ka jylla.
Na ka liang u Myntri ka tnad PHE ba dei ruh u MLA ka thaiñ, u la kyntu jur ïa ki paidbah ba ki paidbah ki dei ban tista ka jingleit ai injek ïa ki khunlung khamtam lei lei ki longkmie ba armet. “Kane ka PHC kan ai ka jingshakri kaba paka na ka bynta baroh ki rympei iing ha kane ka thaiñ,” u la ong.
U la pynpaw ruh ïa ka jingkmen ba hadien 12 snem ba la shu iehkai ïa katei ka jaka ai jingsumar, la lah ban plie noh ha katei ka sngi na ka bynta ka jingmyntoi jong ki paidbah ba bun. U la ïathuh ruh ba mar ïa jop, ryngkat bad ki riew rangbah u la buddien ïa katei ka kam bad da ka jingïarap jong u Myntri ka tnad, Bah AL Hek khlem da buhteng shuh u la wan hi dalade ban plie noh ïa ka.
U Bah Samlin u la pynpaw ruh ïa ka jingsngewnguh ïa ka sorkar MDA hapoh ka jingïalam jong u Conrad K Sangma kum u Myntri Rangbah nangta u Myntri ka tnad, u DHS, ki Lyngdoh, ki Sordar Shnong bad baroh kiba la don bynta lang haduh ba kin da ïoh ban plie noh ïa katei ka PHC kaba la shu ieh iingshrah la 12 snem.
U la ong ruh ba katei ka PHC kan long ka jingkyrkhu ïa ki 24 tylli ki shnong kiba baroh shi katta ki hap ban leit shaduh Sohiong ban ïoh ïa ka jingsumar hynrei mynta pat kin ïoh lut ïa ki jingsumar ha ka shnong la jong. Katkum ka jingïathuh jong u, ïa katei ka PHC la tei ha ka jinglut kaba kot sha ka 1.24 klur tyngka.
“Kane kadei ka jingai sngewbha Kristmas na ka bynta ki paidbah kane ka thaiñ khnang ba kin ïoh ïa ki shnong kiba koit ba khiah,” u la ong da kaba kyrpad ruh ïa u Myntri ka tnad ka Koit ka Khiah ba un ai sa kawei ka Dispensary ha Nongbsap khnang ban pynsuk shuh shuh ïa ki paidbah katei ka thaiñ.
Haba bynrap lang, u MLA ka Mawkyrwat, Bah Renikton Lyngdoh Tongkhar u la ong ba ka long kaba itynnad ba ka don ka jingïatrei lang na ka bynta ban ïoh ïa ka roi ka pa bad ka koit ka khiah ha ka thaiñ watla ka la kham slem hynrei ki paidbah ki dang ïoh pat ïa ka.
Ha kajuh ka por, u Director of Health Services, Dr. TS Nongkhlaw u la ong ba ki paidbah kim dei satia ban ngeit biej hynrei ba ki dei ban kiar mardor na ki hamsaïa halor ka jingai injek khnang ba ki khun jong ki kin long kiba koit ba khiah. U ong ruh ba da ka jingwan jong katei ka PHC, ki paidbah kin ïoh pura ki jingmyntoi khamtam eh ban pynhiar ïa ka jingdon ki khunlung kiba ïap ne ki longkmie kiba ïap por ba armet.
Ha kane ka sngi la ïoh ruh ïa ka jingkren na u DMHO, na ka Synjuk ki Sordar Shnong, na ki trai jaka bad pynshongkun da ka jingrwai bad ki drama na ki khynnah skul bad ki nongshong shnong.