Press "Enter" to skip to content

Ka jingdawa Jylla Garoland ki paidbah Garo

La pynkha ïa ka jylla Meghalaya ha u snem 1972 da kaba kdup lang ïa ki jaidbynriew Khasi Jaiñtia bad Garo hapoh kawei ka shatri. Watla ki jaidbynriew Khasi bad Jaiñtia kim shym la wan na kajuh ka thymmei hynrei ha ka jingdawa ïa ka Jylla bapura ba la lamkhmat da ka Hills State Peoples Democratic Party, ki la ïasnohkti lang kawei hadien ba ka Sorkar Assam ka la pyrshang da ki buit ki lad ban pynlong ïa ka Ktien Assamese kum ka ktien Salonsar mynba ka Meghalaya ka dang hap hapoh ka jingsynshar jong ka Sorkar Assam.
Ha ki 46 tylli ki snem, ka Garo National Council hapoh ka jingïalam jong u Cliffor R. Marak, ka la mih pyrthei shakhmat ban dawa ïa la ka jong ka jylal Jylla na ka bynta ki paidbah Garo da kaba ïa khladnoh na ka Jylla Meghalaya. Ka Hills State Peoples Democratic Party, hapoh ka jingïalam jong u Bah Hopingstone Lyngdoh (bam kwai ha u dwar u Blei) u la pynkhih biang ïa ka jingdawa la ka jong ka Jylla da kaba ïakhladnoh na ki Garo. Hynrei kane ka jingthmu jong kine ki arngut, kam shym la poi shano shano ruh hadien ba ki la khladnoh na kane ka sla pyrthei bad ki pateng kiba hadien mynta kim shym shimkhia shuh ban buddien ïa kane ka jingdawa kumba la kren bad pynpaw da kine ki nongïalam jong kine ki ar tylli ki seng saiñpyrthei kiba pawkhmat.
Ka Seng kieng atiar Achik National Volunteer Council (ANVC) kaba la shah pynduh pyndam ha ka Sorkar ka la aiti ïa ka Map na ka bynta ka Jylla Garoland sha ka Sorkar Pdeng ha u snem 2006 bad ka Garo National Liberation Army (GNLA) ruh ka la ieng ha kajuh ka nongrim ban dawa ïa ka jingpynïoh ïa ka la jong ka Jylla Garoland da kaba kieng atiar.
Hynrei kine ki jingdawa jong kine ki ar tylli ki seng kieng atiar kim shym la poi shano shano ruh namar ka Sorkar Pdeng bad ka Sorkar Jylla ka la lah ban pyndem tdong ïa ki nongïalam jong kine ki ar tylli ki seng kieng atiar bad pynkdiah ruh ïa u budlum treikam jong ki da kaba ïohkem bad ïoh siat ïap ruh ïa ki nongïalam kiba hakhmat.
Ki paidbah Garo kim shym la shong thait ban pynsngew ïa kane ka jingdawa sha ki tyndong shkor jong ka Sorkar bad mynta ka sngi, ka 5 tarik, u bnai Nohprah, 2018 kan long ka sngi sah jingkynmaw ba ki paidbah Garo ki la pynlong syndon da ka jingïalang paidbah ha nongbah Shillong ban pyrta ïa ka sur jingdawa “Garoland” khnang ba kane ka sur kan poi sha ki skhor jong u Myntri Rangbah ka Jylla uba don ïa ka ophis treikam ha Secretariat.
Ha kine ki jingïakhih dawa Jylla jong ki paidbah Garo, la pynkha pat ïa ka Garo Hill State Movement Committee (GHMC) kaba la pynkhih pyrthei ïa kane kane ka jingdawa ha u snem 2012 bad ïai bteng ïa kane ka jingdawa haduh kine ki sngi. Katkum ka jingpynsngew jong u Chairman ka GHSMC, u Nikman Ch. Marak ba ka jingdawa ïa ka Jylla Garoland ka dei kaba la slem bha ïa kaba la dawa da ki paidbah ka rilum Garo naduh u snem 1889 bad ka daw kaba kongsan tam halor kane ka jingdawa ka dei ba ki paid Garo bad ki Khasi ki ïapher bak ly bak pat iwei na iwei ha kaba ïadei bad ka ktien ka thylliej, ka lariti, ka riti ka dustur bad wat ha ka rukom synshar shnong synshar thaw.
Une u nongïalam ka Komiti u la pynpaw shai kdar ba ka daw tynrai hi ka long namarba ka rilum Garo ka long kawei na ki thaiñ kaba dang sahdien haduh kine ki sngi watla ka Jylla Meghalaya ka la ïoh ïa ka Jylla bapura la 46 tylli ki snem.
Mynta ka shong pat ha ka Sorkar Jylla, la kan pdiang neem ïa kane ka jingdawa ba la pynkhih pyrthei da ka Garo Hill State Movement Committee (GHMC) ïa kaba la kyrshan lang ruh da ka Garo National Council (GNC) bad ka Achik Holistic Awakening Movement (AHAM) ba la ïalam da u Champion R. Sangma, uba long u Chairman barim ka Garo National Liberation Army (GNLA), ka seng kieng atiar kaba ïakhun ban dawa ïa la ka jong ka jylla Garoland, kynthup ruh ïa ka Garo Students Union (GSU), ka Achik Youth Council (AYC), ka Mothers’ Union (MU) bad kiwei kiwei ki sengbhalang na rilum Garo.
Kum ban shu kdew hangne, ka seng kieng atiar Achik National Volunteer Council (ANVC) kaba la shah pynduh pyndam ha ka Sorkar ka la aiti ïa ka Map na ka bynta ka Jylla Garoland sha ka Sorkar Pdeng ha u snem 2006. La kynnoh ruh ba katkum kane ka Map, palat 200 tylli ki shnong kiba don hapoh u pud u sam jong ka rilum Khasi kin shah kynthup lang ha kane ka Jylla Garoland.
Ka la mih ruh ka jingpyrshah kaba jur bha na ki sengbhalang ka rilum Khasi haba ki la ïoh jingtip halor kane ka jingthmu jong ka ANVC bad ki la byrngem ruh ba kin ym ailad dalei lei ruh em lada kane ka seng kieng atiar na rilum Garo kan kyntur bad mushlia ïa u pud u sam jong ka rilum Khasi bad Jaiñtia.
Ka Sorkar kan hap ban thaw ïa ka State Reorganisation Commission ka ban bishar ïa kane ka jingdawa jong ka Garo Hill State Movement Committee (GHMC) la ka long neem kaba shong nongrim bad ka long neem kaba dei hok ïa ki paidbah Garo ban ïakhlad lok noh na ki jaidbynriew Khasi bad Jaiñtia bad kumjuh ruh ka Sorkar Pdeng kan hap ban bishar bin pa bin ïa kane ka jingdawa shwa ban shim ïa ka rai kaba khatduh.