Press "Enter" to skip to content

Kular u Bah AL Hek ban ym pynlong politik ïa ka Sub-Centre ha Mawlong

Shillong, Nohprah, 05: U Myntri ka tnat ka Koit ka Khiah ka Sorkar Jylla, u Bah Alexander L. Hek u la kular sha ki paidbah jong ki hynriew tylli ki shnong ba kynthup ïa ka shnong Mawlong, ka shnong Umsawli, ka shnong Madan Saisiej, mawkynring, Lumkseh bad Lumdiengsai kiba don ha New Shillong, ba kan ym don kano
kano ka jingleh politik ha kaba ïadei bad ka jingdawa jong kine ki shnong ïa ka Sub-Centre ha kane ka thaiñ.
Ki nongïalam ka Joint Action Committee (JAC) jong ka shnong Mawlong, ka shnong Umsawli, ka shnong Madan Saisiej bad Mawkynring ha kane ka sngi ki la aiti ruh da ka dorkhas ha u Myntri ka Koit ka Khiah ban dawa pynurlong noh ïa kane ka jingangnud ba la slem jong ki paidbah.
Katkum ka dorkhas jingdawa, ka Joint Action Committee (JAC) ka la pynpaw haba kheiñ kyllum ïa ka jingbun briew ha kine ki hynriew tylli ki shnong ka la kot sha ka 3,106 hajar ngut bad namarkata, ki la pynpaw ba ki la donkam kyrkieh ban don ïa kawei ka jaka ai jingsumar ne ka Sub Centre namar kumba ka long mynta ki paidbah nongshong shnong jong kine ki hynriew tylli ki shnong ki hap ban leit wad jingsumar shaduh ka Diengsapoh Public health Centre (PHC) kaba jngai kumba 23 kilomitar ha ka leit ka wan na kine ki shnong.
Na ka liang u Bah Hek, u la kular hakhmat ki paidbah, ba shen un phah ïa ki ophisar jong ka tnat ka Koit ka Khiah na ka bynta ban jurip ïa ka jaka ban shna ïa ka Sub Centre ha kane ka thaiñ bad kumjuh ruh ban ïasoi ïa ka Gift Deed bad ki bor pynïaid shnong kiba la pynpaw ba ki kloi ban ai ei ïa ka jaka sha ka Sorkar na ka bynta ban shna ïa kane ka jaka ai jingsumar.
Ha kane ka sngi, une u Myntri ka tnat ka Koit ka Khiah u la kyntu ïa ki paidbah jong kine ki hynriew tylli ki shnong ba kim dei satia ban shah ïalam bakla ha ki nongpyntieng ha u 666 haba ka Sorkar ka wan pynbna ïa ki lad jingsumar sha ki paidbah.
“Ki ASHA ki dei kiba nyngkong eh ban ïakynduh ïa phi ban ïathuh ïa ki lad ai jingsumar ha ka liang ka koit ka khiah bad phi dei ban shahniah ruh ïa ki. Phim dei ban shah ïalam bakla ha kino kino ki nongpyntieng bad ki nongïalam bakla,” la kyntu u Bah AL Hek ïa ki paidbah.
Ha kane ka sngi, ka FKJGP ka la aiti ruh ïa ka dorkhas jingdawa sha u Bah AL Hek halor kane kajuh ka jingdawa. La ïoh jingkren ruh na u Bah Dimar Sing Marbaniang, u kyrtong MDC bad na ki Rangbah Shnong jong kine ki hynriew shnong.