Press "Enter" to skip to content

Kut jingmut u Johnny ban pynkhyllem ïa u rang ban ïakhun pyrshah ka Shillong Cage Fighting C’ship

Shillong, Nophrah 5: U Johnny Nongrum ba dei uwei na ki snar ïalehkai mixed martial arts ka jylla, ula kut jingmut hi triang ban pynkhyllem ïa u rang ban ïakhun pyr-shah ïa u, ha ka rynsan ïakhun kaban wan jong ka Shillong Cage Fighting Championship.
Kane ka rynsan ïakhun MMA ka dei kaban pynlong ïa ka da ka Meghalaya Mixed Martials Arts Association (MMMAA) kaban long lashai ka sngi ka 7 tarik u Nophrah 2018, ha Laban Indoor Sports Stadium bad u nongïalehkai ban aireng pyrshah ïa u Johnny dei u Jageet Singh.
Haba ïakren bad u Mawphor, u Johnny, u kam ba mynta ha ka jingim u la sdang ban sngewtynnad bha ïa kane kawei pat ka jingïalehkai, kampher wat hadien ba u la hap ba un ieh noh ïa ka jingim kum u nongïakura (boxer), kaba u da ieid bad sngew sarong kum u rang ïakura ka jylla.
Ka daw kaba pynlonng ïa u Johnny ba un sngew-tynnad ïa ka MMA ka dei namar ba u la ïoh lad ban pyrshang ha ka jingim ïa kiba bun tylli ki rukom ïalehkai ba kynthup ïa ka boxing, jujitsu, muaythai, wrestling, kick-boxing bad kiwei kiwei.
Mano ba lah ban poi pyrkhat ba u Johnny un dang lah ban kiew rynsan biang ha ka jingim ka jong u, hadien ka aksiden kaba u la ngat ha u bnai Lber jong u snem 2011, hynrei ka jingskhem jingmut bad ïakhun ha ka jingim ïa ki jingeh kiba wan ban kah lynti, ka la rung ha ka mynsiem jong u Johnny, uba hadien ba u la koit ïalade na kane ka jingjia, joit sa shisien u la shong pyrkhat ba ïa kata ka sap ba U Blei u la ai, long katba ka long, dei ban pynpaw pyrthei ïa ka, kampher wat la un hap ban kdat noh na la ka jingim ïa ka jingïalehkai ba u ieit thep mynsiem, hynrei ka MMA ka dei pynban ka jingïalehkai, kaba u Johnny mynta u kylla long uwei na ki khlur ba la khreh ban tyngshaiñ ha ka jylla.
“Kaei kaba nga la lah ba ngan jam mynta ha ka jingim ka dei ka jingkyrkhu U Blei Trai Kynrad ba nga sa lah ba ngan ïalehkai biang hadien ba nga la lait na ka jingïap na ka aksiden kali” la pynpaw u Johnny.
U Johnny u pynpaw ïa ka jingsngewnguh bad ai khublei kyrpang ïa u bah Isaiah Kharmawphlang, ba dei artad u nongseng ïa ka shlem ai jinghikai ka Happy Red Rooster MMA Gym, uba la plie lad ïa u ban ïakhun ka Shillong Cage Fighting Cham-pionship.
“Nga shim ïa kane ka kabu ba ngan kyntu ïa phi ki paidbah ba mih shakhmat ban wan ban ai mynsiem ym tang ïa nga, hynrei ïa baroh lang ki paralok kiban ai aireng lem ha ki kyrdan ïakhun bapher bapher ka jong ki, namar ka jingdon lang ka jong phi, kan kyrsoi ha ngi ïa kata ka mynsiem ba ngin ïakhun tyngeh bad lah ruh syndon naka bynta ban pynkhyllem ïa ki rang ïalehkai kiba ieng ban ïakhun pyrshah ïa ngi” la kyntu u Johnny Nongrum.