Press "Enter" to skip to content

Kyndat ka Ïingkashari ïa ka Notification ka Sorkar, hukum pynbeit hapoh shitaiew

Shillong, Nohprah 05: Ka Ïingkashari Meghalaya High Court, hynne ka sngi kala kyndat sharud ïa ka Notification ka Sorkar Jylla ba pynkylla ïa ka Meghalaya State Guest Rule, 1991 khlem kano kano ka jingïasyllok bad ka Ïingkashari.
Ha kajuh ka por, ka Kashari lala hukum ïa ka Sorkar Jylla ban bishar biang ïa kane ka Rule hapoh ka shitaiew lem kumta, kan tian bishar ha ka Sou-moto Comtempt (mukotduma pynkheiñ hukum) pyrshah ïa ki Ophisar ka Sorkar.
Ha ka hukum ba pynmih hynne ka sngi, ka Kashari Single Bench bala khlieh da u Justice SR Sen kala ong ba ka Meghalaya State Guest Rule, 1991 kala don naduh kaba sdang jong ka High Court hynrei la shu weng noh ïa ka khlem da ïasyllok bad ka Kashari da ki katto katne ki Ophisar.
“Ka Sorkar Jylla lyngba ka Amendment, kala pynmih ïa ka Notification ha ka 4 tarik Risaw ha kaba kala pynkylla ïa ka Rule 10 (a) jong ka Meghalaya State Guest Rule, 1991. Ka long kaba sngewsih ba kum ïa kane ka jingpynkylla la leh khlem da ïasyllok lang bad ka High Court. Namar kata, ïa kane ka Notification ba 4 tarik Risaw la kyndat noh sharud” ong u Justice SR Sen ha ka hukum.
Ka Kashari kala hukum ruh ïa ka Sorkar ban bishar biang ïa kane ka Rule kumne-”Retired Judges/ka Kurim bad ki Khun” bad ong “kaba mut ba ki dei ban kynthup lang ïa ka Kurim bad ki Khun ki Kti ba kin ïoh ïa ki lad jingsumar. La hukum ïa u Law Secretary ba un bishar biang ïa kane ka kam kumba la bthah hapoh ka shitaiew”.
Ka Kashari kala hukum ruh ïa ka Tnad GAD ban ai ka jingshakri kat kum ka kyrdan bad ruh kat kum ka Meghalaya State Guest Rules of Retired Judges ka ban long ruh kumjuh sha ki Judge ba dang shakri kynthup ka Kurim bad ki Khun ki Kti. Ka Kashari ka kdew ba kat kum ka Resolution ba 20 tarik Rymphang, ka Kashari ba pura kala mynjur ïa ka resolution ban pyn bun ïa ki nongiarap kam ïing jong ki Judge bala shongthait hynrei ïa kane la phah biang ban pyrkhat thymmai da ka Kashari ba pura. “Ngam shym la pynbor eh mynta ban pynbun ïa ki nongiarap kam ïing bad la ieh ha ka rai jong ka Sorkar Jylla. Hynrei, ka bainong jong ki Nongiarap kam ïing kat kumka Resolution, ka Sorkar ka dei ban kynthup ïa ka Kurim bad ki Khun ki Kti jong ki Judge bala shongthait” ong u Justice SR Sen.
Ka Sorkar kala shah bthah ruh ban pynmih mar mar ïa ka notification haba ïadei bad ka kam ban pynphai noh ïa ka pisa bala siew baiphone jong ki Chief Justice bala shongthait, ki Judge bala shongthait ka High Court, kaba la buh T. 10000 shibnai da ka kashari ba pura. Kane ka mut ba ki Chief Justice bad ki Judge bala shiongthait ki don ka hok ban ïoh T. 10000 shibnai kum ka Mobile Bill, Land Line bad Internet Bill bad kiwei kiwei, bad kumjuh ruh ïa ka mobile ba shongdor T. 80000 na ka bynta ki Judge. Kala kdew ruh ba ha ki shibnai shiteng bala leit, u Chief Justice ula pynlong ïa ka jingïalang kynthup u Chief Secretary, Addl Chief Secretary, GAD bad Law Secretary ka Sorkar hynrei haduh mynta ym shym la paw kam eiei ruh em. “Ïa kine ki kam baroh dei ban pyndep noh hapoh ka shitaiew naduh ka sngi ba pynmih ïa ka hukum lem kumta kan pynbor ïa ka Kashari ban shim da ka mukotduma pynkheiñ hukum pyrshah ïa ka Ophisar” ong ka Kashari kaba la buh ban shong bishar biang ïa kane ka mukotduma ha ka 13 tarik Nohprah ban pynmih sa kiwei pat ki hukum.

More from NewsMore posts in News »