Press "Enter" to skip to content

Mar dep pynbiang UC, yn pyllait noh ka Tribal Affairs 18 klur ïa ka Meghalaya

Shillong, Nohprah 05 : Ka tnad Tribal Affairs jong ka sorkar pdeng ha ka sngi Nyngkongka la bthah ïa ka sorkar jylla ba kan pynbiang noh ïa ki Utilization Certificate khnang ba ka tnad kan ïoh ban pyllait noh ïa ka bhah kaba dei na ka bynta ka Meghalaya.
Ïa katei la pynpaw da u Myntri Khynnah ka tnad Tribal Affairs, u Jaswantsinh Sumanbhai Bhabhor hadien ka jingkynduh bad ka sorkar jylla hapoh ka jingïalam jong u Myntri ka tnad Social Welfare, Bah Kyrmen Shylla ryngkat ka jingdonlang u Chief Secretary bad kiwei kiwei ki ophisar rangbah.
Haba kren bad ki lad pathai khubor hadien ka jingïalang, na ka liang u Myntri ka tnad Social Welfare u la ïathuh ba na ka liang utei u Myntri Khynnah u la bthah ïa ka sorkar jylla ba kan pynbiang noh kham kloi ïa ki Utilization Certificate kiba ïadei na ka bynta ki skim kiba wan lyngba ka Article 275 (1) jong ka Riti Synshar ka Ri, kyrpang na ka bynta ki riewlum, khnang ba ka sorkar pdeng kan ïoh ban pyllait noh ïa ka bhah. “Ki don ki UC kiba sahteng jong u 2016-17 hynrei na ka liang jong u (Myntri Khynnah) u la bthah ba dei ban pynstet noh ban phah ryngkat ka jingkular ba kin pyllait noh kham kloi ïa ka bhah jong ka jylla tang shu ïoh ïa ka UC,” ong u Myntri da kaba ïathuh ba ka Meghalaya kala dei ban ïoh haduh 18 klur tyngka na katei ka tnad kaba kynthup kumba 1 klur tyngka ei ei tang ka scholarship jong ki samla pule. Da kaba kam ba katei ka jingwan jong utei u Myntri Khynnah kadei kaba seisoh, u Myntri u la ong ruh ba ha Meghalaya hi jan baroh ki tnad ki ïa snoh lang ha ka jingpyntrei ïa katei ka skim kaba wan lyngba ka Article 275 (1). La katta u ong pat ba ki tnad kiba kham hakhmat hi ki kynthup ïa ka Social Welfare bad ïa tnad Pule Puthi.
Shwa kane, utei u Myntri Khynnah ka sorkar pdeng u la pynpaw ïa ka jingsngewhun halor ka jingpyntreikam jong ka jylla ïa ki skim bapher bapher jong ka sorkar pdeng. U la kular ruh ba ka Tribal Affairs Ministry kan nang ïai bteng ban kyrshan ïa ka sorkar jylla na ka bynta ka jingpyntrei ïa kiba bun ki skim ha kane ka jylla khamtam na ka bynta ban kyntiew ïa ki riewlum. Hadien ka jingïalang, utei u Myntri Khynnah u la leit ruh ban ïa kynduh bad u Myntri Rangbah ka Jylla, Conrad K Sangma ha kamra treikam jong u.

More from NewsMore posts in News »