Press "Enter" to skip to content

Nalor ba sniew ka um, sa ki jaboh tuid sha ka Dam Mawphlang

Shillong, Nohprah 05 : Ka um na Wah Umïew Mawphlang, kaba la long ka jingïakren ha kine ki sngi namar ka jingbymkhuid ka um ha ka jaka tan um ha Mawphlang, mynta la mih sa kawei pat ka jingeh bad kata ka long ba don sa ki ïing kiba la sdang pyntuid jaboh sha kane ka wah, khamtam ha ki bynta jong ka thaiñ Umtyngar.
Ka dur ba la shon da ki paidbah ba la phah sha Mawphor, ka pyni ba ki don ki ïing kiba la pyntuid nala sha kane ka wah, kaba long ka bynta jong ka wah kaba tuid shaduh Dam Mawphlang ha kaba la pyntrei ïa ka Greater Shillong Water Supply Scheme ban ring um sha ki paidbah ka nongbah Shillong. “Lada ym lah ban leh eiei ïa kane ka jingpyntuid nala, khlem pep kan poi ka por ba kane ka wah kan long kumba long ka wah Umkhrah”, la ong ki paidbah ba la shon ïa kane ka dur.
Nalorkane, ki paidbah ki la ujor ruh ïa ka jingïakop ñiah kali dang shen ha katei ka thaiñ, ha kaba da ki phew tylli ki kali ki la ïaid lyngba kane ka wah bad pynjaboh ïa ka um. “Ngim lah ban tip ka diesel, ka petrol, kamobil ka lah ban jaw na kine ki kali kiba ïaid na kane wah kaba mut ka um kan jaboh beit, te kumno ngin dih ïa kane ka um?”, la kren bynñiaw ki paidbah.
Lah ban kdew hangne ruh, ha kane ka wah, ka sorkar ka la shna da ki check dam, khnang ban ïada ïa ka jingtuid u shyiap sha tyllong um ha Mawphlang. Ym tip pat haduh katno kane ka la ïarap. Lah ban kdew hangne ba dang shen, u MLA ka Mawphlang, u la leit jurip ïa ki jaka ring um na Mawphlang da kaba jurip ruh ïa ki top um, namar ka jingujor ki paidbah ïa ka jingjaboh ka um kaba wan na katei ka tyllong um.

More from NewsMore posts in News »