Press "Enter" to skip to content

Pynshai Bah Thomas ïa ki Nongkyrshan

Shillong, Nohprah, 05: Ki nongkyrshan jong u Bah Thomas Passah, uba la mih shakhmat ban ïakhun ïa ka elekshon MDC ha u snem 2019 sha ka Iingdorbar Thawaiñ jong ka Khasi Hills Autonomous District Council (KHADC), ki la kyntu ïa u ba um dei satia ban randien na ka lympung ïakhun wat lada u dei makna ban hap ïakhun ruh kum u kyrtong shimet.
Kane ka jingkyntu jong ki nongkyrshan u Bah Thomas uba la mih ban aireng na Jaïaw Constituency, ka long hadien ba ka la mih ka kynrum kynram bad ka huri hura hapdeng ki nongïalam jong ka Khun Hynñiewtrep National Awakening Movement (KHNAM) kumba la paw ha ki lad pathai khubor.
U Bah Thomas Passah, uba long ruh u President ka KHNAM State Youth Wing bad u Vice President ka KHNAM Central Body ïa kaba ka seng KHNAM ka ladep ban pynbna paidbah lyngba ki lad pathai khubor ba un dei u kyrtong MDC na Jaïaw Constituency Committee, u la lum ïa ka jingïalang jong ki nongkyrshan ha Dorbar Hall Lumkshaid na kylleng ka Constituency hynnin ka sngi baar.
Ki nongkyrshan ha kane ka jingïalang ki la pynpaw ka jingsngewkhia halor ki kynrum kynram kiba la mih hapoh ka KHNAM kumba la paw lyngba ki lad pathai khubor kaba la buh ha ka jingklumar jingmut ïa ki paidbah ka Constituency.
Hynrei da kawei ka sur ki la rai beit ban kyrshan borbah ïa u Bah Thomas. Baroh ki nongkyrshan ki kyntu ïa u Bah Thomas ban um dei ban randien wat lada hap un hap ban ïakhun ruh kum u kyrtong shimet.
Na ka liang jong u Bah Thomas u la kyntu ba kin long kiba ïai shah bad kiba ïai pyrshang. “Haba ngi ïaid ha ka lynti kaba bha bad da ka jingmut kaba shai shibun ki jingeh ngin ïakynduh ki ban pyrshang ban pynduh mynsiem ïa ngi, hynrei ngi dei ban pynskhem ïa ka jingmut jingpyrkhat bad ban tur shaphrang khlem duh jingkyrmen.”
“Ngi ladep ban ïaid iing shibun tylli ki shnong jong ka Constituency kum u kyrtong jong ka KHNAM, hynrei ka jinghuri hura ha ka seng kan buh ha ka jingklumar jingmut ïa ki paidbah, hynrei ka jingkyrmen ka long ba ki paidbah ha ka juk kaba mynta ki la long kiba stad bad kiba shemphang,” u la ong bad bynrap, “la don shibun ki jingpyrshang ban pynbha bad ban wan sha ka jingïasngewthuh jingmut hapdeng ki ar liang ha ka seng, hynrei la ïohi ba kat dang ïaid ki sngi katta ka dang jwat.”
U Bah Thomas la ong shuh shuh, “nga la rai ban ïakhun ïa kane ka elekshon namar ki jingthrang bad ki jingangnud ban trei na ka bynta ka jingmyntoi jong u paidbah bad ban pynthikna ba ki paidbah kin dap da ka jingkyrmen bad nga la shim ruh ïa kane ka rai hadien ba baroh ki dkhot bad ki nongïalam jong ka seng ki la ai mynsiem, bad ym don uwei ruh u dkhot lane nongïalam jong ka seng u ba pynduh jingkyrmen.”
“Ngim lah ban leh eiei ïa ki 46 tylli ki snem kiba la ieh shadien, hynrei ban saiñdur ïa ki 50 snem lane ki 100 snem ki ban wan ka dei ka bynta bad ka deiti ka jong ngi,” u la bynrap.
U la ong ruh ba ki jingjia ha kine ki khyndiat sngi ha ka seng ka pynsngewsih hynrei kam lah ban pynduh jingkyrmen pat ïa ka mynsiem ïaleh.
Ha kane ka jingïalang u Bah Thomas u la pynthikna sha baroh ki nongkyrshan ba kum ba la pynkhreh un ïaid shakhmat khlem randien ban ïakhun ïa kane ka elekshon MDC 2019.