Press "Enter" to skip to content

Rai ka Confederation ban dawa shuti ha ka sngi ‘Shad Sajer’ ha Ri Bhoi

Nongpoh, Nohprah 05: Ka tamasa ba ar sngi kynthih ba la tip kum ka ‘Tamasa pynneh la riti ka la sdang mynta ka sngi ha Madan Pahamsyiem, Nongpoh bad ka thong jong katei ka tamasa ka long ban pynneh pynsah ïa la ki riti ki dustur bad ruh lyngba kane ka tamasa yn dawa ruh sha ka sorkar jylla ba ka dei ban pynbna shuti noh ha ka sngi ‘Shad Sajer’ kaba ju long man la u snem kum ka jingburom ïa kane ka shad tynrai jong ka Hima 12 Lyngdoh ba ki angnud ba ka sorkar kan leh lang kumjuh kumba long lem ha kiwei kiwei ki District kum ha ka Beh Diengkhlam, Shad suk Mynsiem bad kiwei kiwei.
Kane ka tamasa pynneh la riti ka dei kaba la pynlong da ka Confederation of Sports, Arts & Culture jong ka Hima 12 Lyngdoh ha kaba la sdang da ka jingïaid paidbah na Urban Affair Shopping Complex, Nongpoh bad pynkut ha madan NSCA, Mini Stadium, Pahamsyiem Nongpoh.
Kum ka jingsdang kane ka tamasa ba la ïaid paidbah da ki khun ki hajar bad ki samla samhoi ka Hima 12 Lyngdoh, ha kane ka jingïaid paidbah la wan ban shim bynta ruh da u MLA ka Jirang, u Bah Sosthenes Sohtun kum u kongsan bad ryngkat ka jingsynran u Sirdar ka Nongpoh Elaka Sirdarship, u Chairman ka Confederation, u Bah Augustine Wahlang, u Bah C.B Syiem, CEM barim ka KHADC bad kynthup ki longsan ki mansan bad ki rangbah shnong na ki Shnong bapher bapher ba hap ha ka Hima 12 Lyngdoh.
Kaba la pynphuh pynphieng ruh ha kane ka sngi sdang ka Tamasa la ïohi ba ki khun samla kynthei bad shynrang bad ruh ryngkat ki Longsan ki mansan ki la shim bynta ha ka riam tynrai jong ki raid bapher bapher ba hap ha ka hima 12 Lyngdoh kaba long shisha ka jingriewspah ha ka riam tynrai.
Haba kren ha kane ka sngi, u Sirdar ka Elaka Nongpoh Sirdarship, u Bah Wanphrang Syiem bad u Chairman ka Confederation, u Bah Augustine Wahlang, ki laong ba ka daw kaba la pynlong ïa ka Hima bad ka Confederation ban pynlong ïa kane ka Tamasa ka long ban pynneh pynsah ïa ki riti ki dustur bad ki riam tynrai jong ka Hima 12 Lyngdoh.
Ki la ong ruh lyngba kane ka Tamasa kin pynsngew ruh sha ka sorkar ban dawa ai shuti ha ka lyngkhuh sngi ‘Shad Sajer’ kaba dei kawei na ka shad tynrai ba paw nam ha Ri Bhoi kumba long lem ha kiwei kiwei ki District kiba ju ïoh shuti haba don kum katei ka tamasa ne ka shad tynrai.
`Namarkata, ki laong ba ngi kyrpad jur ïa ka sorkar jylla ba kan burom lang kumjuh ïa kane ka shad tynrai ha Ri Bhoi kaba ka hima 12 Lyngdoh ka dang pynneh pynsah bad pynim haduh kine ki sngi bad kum ka jingburom ïa katei ka Shad Sajer ka Hima ka dawa na ka sorkar ba ka dei banpynbna shuti noh ha kane ka sngi shad tynrai kaba ju long man la u snem ha Ri Bhoi District, ki la bynrap.
Haba kren pat ha kane ka sngi na ka liang u MLA, u bah Sosthenes Sohtun kum u kongsan, u la pynpaw ka jingkmen ba ka Hima 12 Lyngdoh bad ka Confederation ki la lah ban pynlong ïa kane ka tamasa bad kane ka tamasa ka pynkynmaw ba ka jaid bynriew ka deiban burom ïa la ka riti ka dustur bad ka niam tynrai la ka long ha kano kano ka jaid bynriew.
Kum u nongmihkhmat na Ri Bhoi u la kular ruh ban shim khia ban ïa kren sha ka sorkar halor ki mat jingdawa ka Hima ban pynïoh shuti ha ka sngi shad Sajer bad u kyrmen skhem ruh ba kane ka shad Sajer kan long ka jingpynneh pynsah naduh ki riti ki dustur, ki shad tynrai bad kiwei kiwei ki lehniam leh rukom tynrai kumba la ïalam naduh ki longshuwa ki manshuwa.