Press "Enter" to skip to content

Sawa jam ka jingdawa ‘Garoland ki paid Garo ha Shillong, khlem kynduh u CM

Dawa ban thung ïa ka State Re-organisation Commission

Shillong, Nohprah, 05: Da ki spah ngut ki paidbah Garo mynta ka sngi balang ki la pynlong da ka jingïalang paidbah ha nongbah Shillong ban pynbor ïa ka Sorkar Pdeng bad ka ka Sorkar Jylla ba kin sngap ïa ka jingdawa ban pynkha thymmai ïa ka Jylla Garoland.
Ïa kane ka jingïalang paidbah la pynlong da ka Garo Hill State Movement Committee (GHMC) ha Parking Lot kaba don markhap bad ka ophis Additional Secreteriat, Shillong ïa kaba la ai jingkyrshan ruh da ka Garo National Council (GNC) bad ka Achik Holistic Awakening Movement (AHAM) ba la ïalam da u Champion R. Sangma, uba long u Chairman barim ka Garo National Liberation Army (GNLA), ka seng kieng atiar kaba ïakhun ban dawa ïa la ka jong ka jylla Garoland, kynthup ruh ïa ki dkhot ka kynhun Garo Students Union (GSU), ka Achik Youth Council (AYC), ka Mothers’ Union (MU) bad kiwei kiwei.
Namar ka jingbym ailad jong ki bor synshar ka East Khasi Hills District ban ïaid proseshon, ki paidbah Garo kiba la riam ruh da ki riam tynrai, ki la pynlong da ka jingïaid tawiar tang hapoh ka jylli jong katei ka jaka pynieng kali kaba don hajan ka ophis Additional Secretariat, Shillong da kaba pyrta jam ïa ka sur, ““No state no rest, We want Garoland”, “Garoland is our birth right” bad kiwei kiwei ki sur pyrta.
U Chairman ka GHSMC, u Nikman Ch. Marak, ha ka jingïakren bad ki lad pathai khubor u la ong,, “ka jingdawa ïa ka Jylla Garoland ka dei kaba la slem bha ïa kaba la dawa da ki paidbah ka rilum Garo naduh u snem 1889.”
“Naduh ba dang synshar ki Phareng haduh mynta, ka Sorkar kam shym pat sngap satia ïa kane ka jingdawa kaba la dap spah snem,” u la ong.
U la ïathuh ruh ba ka GHSMC ka angnud ban pynurlong ïa kane ka jingdawa da ka lynti jong ka jingïakren ym da kaba ïaumsnam bad kaba kieng atiar. “Ngi dawa, namarkata, ïa ka Sorkar Pdeng bad ïa ka Sorkar Jylla ba ki dei ban khot pynlong kloi ïa ka jingïakren bad ngi,” ong une u Chairman
Ki nongïalam jong kane ka kynhun kiba la rai ban leit ïakynduh ïa u Myntri Rangbah ka Jylla, u Conrad K. Sangma ban pynsngew halor kane ka jingdawa hynrei u Myntri Rangbah u la kyntait ban ïakynduh ïa ki.
Ha kajuh ka por, u la ïathuh ba ka Komiti kan sa shong ïaphylliew jingmut ïa ka rai kaba mih na ka jingïakren bad u Myntri Rangbah shwa ban pynjur shuh shuh ïa kane ka jingdawa.
Haba kylli ïa ka daw kaba pynlong ïa ka GHSMC ban pynsngew paidbah ïa kane ka jingdawa, une u Chairman ka GHSMC u la ong, “naduh ba la pynkha ïa ka Jylla Meghalaya ha u snem 1972, ki paid Garo bad ki Khasi ki im hapdeng ka shongsuk shongsaiñ hynrei ngi ïapher bak ly bak pat iwei na iwei ha kaba ïadei bad ka ktien ka thylliej, ka lariti, ka riti ka dustur bad wat ha ka rukom synshar shnong synshar thaw.”
“Hynrei lada ka rilum Garo kam ïoh satia ïa la ka jong ka Jylla, ngin ym lah ban weng ïa ka jingsahdien kaba ngi la mad la 40 tylli ki snem,” u la bynrap.
Katkum ka jingïathuh jong une u Chairman ka GHSMC, ka jingbun briew jong ki paidbah Garo ha ka Jylla Meghalaya baroh kawei ka long kumba 12 lak ha kaba 9 lak ngut ki im bad ki shong ki sah ha ki san tylli ki District jong ka rilum Garo.
Kum ban shu kdew hangne, ka seng kieng atiar Achik National Volunteer Council (ANVC) kaba la shah pynduh pyndam ha ka Sorkar ka la aiti ïa ka Map na ka bynta ka Jylla Garoland sha ka Sorkar Pdeng ha u snem 2006.
La kynnoh ruh ba katkum kane ka Map, palat 200 tylli ki shnong kiba don hapoh u pud u sam jong ka rilum Khasi kin shah kynthup lang ha kane ka Jylla Garoland.
U Marak, u la ong ïa ka Map na ka bynta ka jingdawa Jylla Garoland yn sa lah ban dro tat hadien ynda ladep ka jingïakren bad ka Sorkar Jylla, bad ki Seng Saiñpyrthei bad ki Sengbhalang bapher bapher kiba mihkhmat ïa ki lai tylli ki jaidbynriew trai ri trai muluk jong ka Jylla. Ha kajuh ka por, kane ka Komiti ka la dawa ruh ïa ka Sorkar ba kan thaw biang ïa ka State Reorganisation Commission.
Une u Chairman ka GHSMC u la kdew nuksa ruh da kaba pyni ba dei lyngba ka jingmynjur jong ka State Reorganisation Commission ha u snem 1956, la pynkha ïa ka jylla Karnataka bad ïa kiwei kiwei ki jylla ha ka ri India.
“Namarkata, ngi kwah ba ka Sorkar kan thaw biang ïa ka State Reorganisation Commission ha kane ka kynti khnang ba ngin dup lah ban pynurlong ïa ki jingdawa jong ngi,” u la bynrap.
U Deputy Chief Executive Member (Dy. CEM) barim ka GHADC, u Austine Marak, uba long ruh u MDC ka Garo National Council (GNC) ula pynpaw ba ka party jong u ka ladep pynsngew sha ka Sorkar halor ka dorkhas jingdawa ba ladep aiti da ki nongïalam barim ka rilum Khasi bad rilum Garo.
U Marak uba long mynta u Chairman jong High Powered Committee (HPC), ka GHADC u la ïathuh ba u la ïoh ïa ka jingkyrshan kaba pura halor ka Resolution ba u la wanrah hapoh ka Iingdorbar.
Une u nongïalam ka GNC u la pynpaw ruh ba ka por ka la ih ba baroh ki Seng Saiñpyrthei ha ka Jylla kin ïatylli lang kawei halor kane ka ishu.