Press "Enter" to skip to content

U Kynja u pynmih u ksai u bha: VH Pala

Jowai, Nohprah 05: U Member jong ka Parliament Lok Sabha-Shillong Seat U Ma VH Pala ula ong “Lada ym khang ka aiñ bad ka sorkar la dei ka por ban rep da u kynja ne bhang namar ba u pynmih ïa u ksai ba bha na ki dieng tnad jong u. Hynrei namar ba la khang pyrshah ban rep ïa une u mar ba udei u mar ba pyndonkam ban dih pynbuiad ngi duh ïa u ksai ba mih na une u jingthung”.
“ Nga la pyrshang ban kren bad uwei u scientists ban pynduna ïaka bor buiad jong u Kynja bad ban pule bniah ïaki symbai bad dieng kynja ne bhang ban ïarap ban pynmih ksai kiba ïasyriem bad u rusom bad ryndia”, la ong u ma Pala haba kren haka jingïalang plie paidbah ïaka Centre jong ka Pradhan Mantri Kaushal Kendra (PMKK) kaba pynïaid da ka CARE (Care Educational & Welfare Society) haka shnong Khliehtyrshi, West Jaiñtia Hills District haka sngi Balang.
Kane ka PMKK ka dei ka skim jong ka Ministry of Skill Development & Entrepreneurship (MSDE). Ka jingthmu jong ka, ka dei ban plie lad plie lynti ïaki samla jong ka ri kiba ym pat ïoh kam ïoh jam ban tbit ïalade ha kino kino ki kam kaba ki tip (skill training) kaba ïarap ïaki ban ïoh ka lad ban seng kam seng jam bad ban kamai jaka kpoh.
Nalor u MP uba long kum u kongsan la ïadonlang u Chief Executive Member jong ka Jaiñtia Hills Autonomous District Council (JHADC) U Ma Madonbai Rymbai, U Project Co-ordinator jong ka thain shatei lam mihngi jong skil India u Zakheer Hussain, U Waheh Chnong Khliehtyrshi U Ma Kitbok Rymbai, Ka Pushpa Chetri kaba na Ribhoi Centre bad ki samla kiba la rung ban shah pyntbit ha katei ka jaka pule ne centre PMKK ha Khliehtyrshi.
Kane ka centre ka don harud ka surok bah hajan ATS bad Tyrshi Inn bad mynta kala don kumba 100 ngut ki khynnah samla kiba rung klas ban ïoh jinghikai pyntbit haka kam thaw kam thain jaiñ bad ka ban shna ïaki tiar electronic ba pyndonkam ha ïing (home appliances).
U Ma Madonbai Rymbai, ha ba kren kum u symbud kongsan ula kyntu ïaki samla ban shim kabu ïaki lad jingïarap ka sorkar bad pyntbit ïalade ïaki jait jinghikai ba ki ïoh na ka PMKK Centre khnang ba kin lah ban ïeng hala ki jong ki kjat.
“Baroh ngi la sngewthuh ïaka jingeh ban ïoh kam ïohjam bad ym pat lah ban weng ïaka kyrduh kam kyrduh jam jong ki samla bala nang bala stad haduh mynta. Ka JHADC, ka Sorkar Jylla bad ka Sorkar Kmie ruh ki shem jingeh ban weng ïa kane ka kyrduh kam bad da ka jingstad jong ka sorkar pdeng kala pynthikna ba ki samla kin ïoh kam daka sdang ïaka Skill India ban plie lad ïaki ban seng kam lajong. Phi ki samla kiba wan shah hikai ha kane ka centre pyndonkam hok ïaka sap ka phong jong phi bad trei shitom khnang ba lawei jong phi kan long kaba phyrnai”, la ong u CEM JHADC.
Shuh shuh u Ma Pala haba kren kum u kongsan ha katei ka jingïalang ula ong ba kane ka Skill India ka dei kaba la sdang la kham slem bad la sdang lyngba ki IIT bad mynta la nang pynbha ïaka da kaba pynpoi ïaki centre sha ki jaka kyndong tam ban hikai pyntbit ïaki samla bym ïoh kam ba kin lah ban ieng hala ki jong ki kjat bad ban kamai jakpoh.
Ula ïathuh ba hadien ba pass na kum kine ki centre jong ka skill India, bun ki samla kin ïoh kam ïoh jam tang hapoh 6-7 bnai ha kino kino ki jait kam ba kila pyntbit ïalade bad ka kham pynsuk ruh ban ïoh ka ram ne loan na ki bank .
“Mynta naduh ki hotel, guest house haki jaka ban khring ïaki tourist bad kiwei kiwei ki kam ki bun bad bun ngut ki samla kila trei sha bar hadien ba kila ïoh jinghikai ba janai”, la ong u Ma Pala bad bynrap ba lyngba kine ki centre lah ruh ban hikai ha kaban buh jingkhien jingdiah (account) bad kiwei kiwei ki kam bad ïadei da ko kor computer. Ula kitbok kitrwiang ïa kane ka centre bad ki samla ba shah hikai pyntbit ban ïaid shaphrang bad ba kin jop bad ïoh ka lad ba kin ieng haka ki Jong ki kjat abd kamai jakpoh.