Press "Enter" to skip to content

50 snem ïaid lynti ka School of Nursing jong ka Civil Hospital

Shillong, Nohprah, 06: Ka School of Nursing, Civil Hospital, Shillong mynta ka sngi palei ka la rakhe ïa ka jingïaid lynti kaba 50 snem ha kaba ai jinghikai sha ki samla pule kiba angnud ban shakri kum ki Nurse.
Ïa kane ka jingrakhe la pynlong ha Nightingale House, Nursing Training Centre, Civil Hospital, Shillong ha kaba u Myntri ka tnat ka Koit ka Khiah, u Bah AL Hek,u la long u Kongsan, katba u Bah TS Nongkhlaw, DHS (MI) u la long u Symbud Kongsan.
Ka phang rakhe ka long, “50 glorious years in the heart of health care and mile to go…” U Bah AL
Haba kren kum u Kongsan, u Bah AL Hek u la ong ba ka long ka jingkyrkhu ïa ka imlang ka sahlang na ka jingdon jong ki Nurse kiba la shah pyntbit. “Ngi dei ban ai jingïaroh ruh ïa ka jingaiti lut jong ki ban shakri ïa kiba pang bashitom ha ka Jylla bad khamtam ha ki khep ba ki ïakynduh jingeh. U la kyntu ruh ïa kane ka Nursing School bad ïa ki Nurse ba kin trei shitom da ka jingaiti lut bad ban ïatreilang ha baroh ki liang khnang ban pynbha bad ban pynjanai ïa ka jingshakri ha ka koit ka khiah.
U Bah TS Nongkhlaw, haba kren kum u Symbud Kongsan u la ai khublei ïa kane ka School of Nursing kaba la jam ïa ki 50 tylli ki mawmer naduh ba la seng ïa ka ha u snem 1968.
Naduh ba la sdang, kane ka School of Nursing ka la pynmih haduh 550 spah ngut ki Nurse kiba kyrpang bad kiba kynsai kiba la shakri, kiba la aiti lut ïa ka jingim met bad mynsiem ha ki bynta bapher bapher ka Jylla. U Bah Nongkhlaw u la kyntu ruh ïa ki Nonghikai ba kin bsut ha ka jingmut jingpyrkhat jong ki samla pule ba ka kam trei Nurse ka dei kaba don burom bad ki Nurse ki dei ban long ruh kiba kloi ban trei sha kino kino ki bynta jong ka Jylla bad ba kim dei ban shu wad ïa ki jaka trei tang ha ki jaka sor. U la banjur ruh ïa ki nonghikai ba ki dei ban pynjanai ïa ki lad jingai jinghikai khnang ban pynthikna ba ki Nurse kiba la pyndep ïa ka jingpule na kane ka Nursing School kin long kiba kham kyrpang.
Ha kane ka sngi, u Bah AL Hek u la ot ruh ïa u Cake rakhe jubili bad pyllait ruh ïa ka souvenir. U kongsan u la pynkup burom ruh ïa ki khynnah skul barim jong kane ka skul kiba la shakri sha ki bynta bapher ba[her jong ka jylla ha ki snem kiba mynshwa.