Press "Enter" to skip to content

Haduh 23, 999 tylli ki SHC ladep sam sha ki Nongrep ha West & East Jaiñtia

Jowai, Nohprah: Ka ophis jong ka Research Officer, District & Local Research Station & Laboratories, West Jaiñtia Hills ha ryngkat ka jingïatreilang bad ka ophis District Agriculture mynta ka sngi 5 tarik u Nohprah ki la rakhe pyndon burom ïa ka sngi “World Soil Day” halor ka phah “Be the Solution to the Soil Pollution” kaba la long ha Tpep Pale Community Hall, Jowai.
U ma Kyrmen Shylla myntri ka Printing and Stationeries jong ka sorkar jylla ha ka kren kum u kongsan u ong ba ka khyn dew ka long kaba donkam eh ïa ka mariang khamtam ha ka liang jong ka thung ka tep, kum u briew dei ba sumar bad ban ïaleh katba lah ban pynbha ïa ka khyndew na ka bynta ka rep ka riang.
U la ong ruh ba ka jingpynjot pathar ïa ka khyndew lyngba ka jingpyndonkam ïa ki plastic bad kiwei de ha kylleng sawdong ka mariang ka pynsniew dur shisha ïa ka jingitynnad jong ka mariang la ong u ma Shylla. Ha ka juh ka por u buh ka jingkyntu jur ïa ki nongrep ba kin sdang noh ïa ka rukom rep khlem da pyndonkam ïa ki dawai sboh (Chemical) bad ha ka juh ka por dei ruh ban thung bun tylli ki dieng.
U Deputy Commissioner Garod LSN Dykes ha ka jingkren u ong “u Blei u thaw kyrpang ïa ka bneng bad ka khyndew ha ki jingitynnad” bad dei lyngba ka jingkhwan myntoi jong u briew la pynsniew dur shisha ïa ka mariang, “lada ngi kwah ban ïohi biang ïa ka lawei kaba itynnad ngi dei ban sumar bha ïa ka khyndew” la ong u ma Garod LSN Dykes.
Ka kong B. M Majaw, District Horticulture Officer, Jowai ha ka jingkren plie ka la ïathuh lyngkot ïa ka history jong ka “World Soil Day” da kaba ong ba ïa kane ka sngi la rakhe manla u snem na ka bynta ban ai jinghikai ïa ki nongrep khnang ba kin sumar bad khmih bha ïa ka khyndew, ka la ong ruh ba na ka liang ka sorkar jylla ka la shim khia ban ai mynsiem ïa ki nongrep ban kin ym pyndonkam da ki dawai sboh haba thung jingthung khnang ba ka khyndew kan lait na ki jingma.
Ka la kyntu ïa ki nongrep ba kin phah Test ïa ka kyndew thung jingthung jong ki ha ka Research Officer, District & Local Research Station & laboratories khnang ba kin dup tip kiei ki jingthung kiba lah ban sei soh bha ha kata ka jaka ba ki rep. Ka kong B. Nongbri, Research Officers ka la pyntip ba haduh 23, 999 tylli ki Soil Health Cards la dep ban sam sha ki nongrep kiba na West bad East Jaiñtia Hills na ka bynta ka sien ba nyngkong first cycle jong u snem 2015- 2017 bad ïa ka Second cycle jong u 2017-2019 yn sam sa 24,000 tylli ki Soil Health Cards sha ki nongrep hadien ba ki la dep ban phah test ïa ka khyndew na ka bynta ban rep ban riang.