Press "Enter" to skip to content

Ki kyrteng jongno ki 9 ngut ba la aiti ki Pulit sha ka Kashari

Ka Jingjia ha Soshrieh

Shillong: Ki Pulit ki la aiti khyndai tylli ki kyrteng, ba la thep ha ka envelop ha ka Kashari High Court of Meghalaya, ha kaba ïadei bad ka jingshah thombor i Kong Agnes Kharshiing bad ka Amita Sangma ha Sohshrieh ha ka 8 tarik u bnai baladep.
Kine ki kyrteng kidei jong ki briew ba la suba ba ki donkti ha kaba thombor ïa kine ki arngut ki longkmie ha ka por ba ki dang leit tohkit ïa ka kam khaïi dewïong beaiñ ha East Jaiñtia Hills. “Ngim tip kidei ki kyrteng jongno, namar kane kadei ka kam jong ki nongbishar ban peit”, la ong u nongsaid aiñ ba la ïeng na ka bynta ki nongujor.
Kane kadei ka jingshim bishar kaba lai halor ka jingdawa tohkit CBI, i Kong Agnes bad ka Amita halor ka jingshah thombor jong ki. La sngewthuh ba ka ïingbishar kam sngewhun satia ïa ka rukom tohkit ki Pulit halor kane ka jingjia bad ka la ai por biang sa shiphew sngi ban shim bishar biang ïa kane ka kam.
Hynrei ka jingkylli kaba mih mynta ka long ki jongno kine ki khyndai tylli ki kyrteng ba ki Pulit ki la ai sha ka Kashari, hato ki lah ban dei jong ki heh haiñ ba ki Pulit ki ai beit ïa ki kyrteng ha ka envelop?. Shuh shuh, kaba pynsuba ba ki lah ban dei ki heh, ka long balei ki Pulit kim kem ïa kine ki khyndai ngut, haba ka la ïoh ïa ki kyrteng bad phah sha ïingbishar. Hato ki Pulit ki dap ban da ïoh hukum na ka ïingbishar ban kem?. Kine kidei ki jingkylli kiba pynlyngngoh.