Press "Enter" to skip to content

Kner jingïarap ka ‘We Hope Foundation’ sha ki briew kiba duna dkhotmet

Shillong, Nohprah, 06: Ka Kynhun ‘We Hope Foundation’ hynnin ka sngi balang ka la leit ai jingïarap ïa kawei ka longïing baduk, kaba don ar ngut ki briew kiba don ka jingduna ha ki dkhotmet ha ka bor pyrkhat. Kine ki arngut kiba duna dkhotmet ki long ka Kong Speiñdaris bad ka Spailin Jyrwa kiba dei na ka shnong Diengsyiang, West Khasi Hills District.
Kane ka kynhun ka la noh synniang sha kane ka longing da ki tin sop ïing, ka duli Goodrej, ki borti, ki khiew um, ki tiar shet, ki nep kup syaid. Ka ‘We Hope Foundation’ ka la ai jingïarap ruh da ka pisa ïa hynriew ngut ki briew kiba don ka jingduna ha ki dkhot met kiba dei na katei kajuh ka shnong da ka jingsakhi lang jong ki kmie ki kpa, ki nongïalam shnong, ki nongïalam Balang bad ki nongïalam ka Khasi Disabilities Association (KDA).
Ïa kine ki jingïarap la aiti da u Samla Lucky Star Lamin President ka We Hope Foundation ha ryngkat ka jingïadonlang u Secretary Bah Consolarlang Swett, u Publicity Secretary Bah Pyndapborlang Kharpuri, u Programme Manager u Bah Beverly Suchen bad u Bah Starwin Kharjana President ka Khasi Disabilities Association (KDA) bad kiwei kiwei.
U Bah Lucky Star Lamin haba ai mynsiem ïa kine ki briew kiba duna dkhotmet, u la ong, “kine ki jingïarap ki dei kiba ngi ïa synñiang para dkhot ban ai jingïarap manla ka por sha ki parabriew kiba wan na ka longïing baduk. Haba ngi ieit, ngi ai bad haba ngi ai ka mut ngi ieit, u la ong ka jingieit jong ngi ïa u Blei ha kaba rieh, ka dei ban paw lyngba ka jingieit bad ki jingïarap jong ngi ïa ki parabriew ha kaba paw bad ngi don ïa ka thong.
Ka ‘We Hope Foundation’ ka dei ka kynhun kaba trei bad kaba shakri na ka bynta ki briew kiba don jingduna ha ki dkhotmet, ïa ki khunswet bad ïa ki longïing baduk bad dei lyngba ka jingïatreilang bad ka Khasi Disabilities Association (KDA) ba kane ka kynhun ka la jied ban ai jingïarap ïa kane ka longïing baduk ha ka shnong Diengsyiang.
U Bah Starwin Kharjana, President ka Khasi Disabilities Association (KDA) haba kren ha kane ka sngi, u la ai ka jingïaroh ïa ka ‘We Hope Foundation’ kaba la ïarap ïa ki briew kiba don ka jingduna ha ki dkhotmet bad kyntu ruh ïa kiwei pat ki seng trei monsngewbha ba kin bud ïa kane ka nuksa namarba ki briew kiba don ka jingduna ha ka bor pyrkhat ki kham kmen ïa ki jingïarap kaba ki ïohi.
Ha ka jingïalang balyngkot ba la pynïaid da u Bah W. Wanñiang Secretary Shnong ka shnong Diengsyiang u la ai ka jingïaroh shikatdei eh ïa ki matti isynei jong ka ‘We Hope Foundation’ bad u la ong ha ka jingim jong u ka dei ka sien kaba nyngkong ban ïohi katne ki lad jingïarap tang ïa kawei ka longïing baduk ba kin wan ai hi shaduh nongkyndong.
Kiwei kiwei kiba la ai jingkren ki kynthup ruh ïa u Bah Consolarlang Swett, Secretary ka We Hope Foundation, u Bah Michael Thongni General Secretary ka KDA.