Press "Enter" to skip to content

Kular u Dy. CM ban pynïoh shuti ha ka ‘Shad Sajer’ ka Hima 12 Lyngdoh

Nongpoh, Nohprah, 06: U Symbud Myntri Rangbah ka Jylla, u Bah Prestone Tynsong u la kular ban pynioh shuti noh ha ka ‘Shad Sajer’ ba shisien shi snem jong ka Hima 12 Lyngdoh kum ka jingburom ïa kane ka shad tynrai kaba long ka jingpynneh pynsah ïa la ki riti ki dustur ha ka them Ribhoi.
Haba iashim bynta kum u Kongsan ha ka sngi pynkut ïa ka tamasa ‘Pynneh La Riti’ ha Ri Bhoi ba la pynlong da ka Confederation of Sports, Arts, and Culture ka Hima 12 Lyngdoh ha Ri Bhoi ha Madan Pahamsyiem, u Bah Prestone u la ong, “ka sorkar MDA ka shimkhia bha ban pynshlur ban pynneh pynsah ïa la ki riti ki dustur jong kano kano ka jaidbynriew ha ka jylla ha kaba ka thong ka long ban pynkhlaiñ ïa ka jaidbynriew ba ka dei ban long kaba riewspah ha ki riti ki dustur kaba dei kawei ruh na ka lad ban khring ïa ki nongjngohkai pyrthei.”
U la ong ruh ba ka Sorkar ka la shimkhia ruh wat ban pynrung ïa kino kino ki tamasa tynrai kiba pynneh la ki riti ki dustur ha ka map jngohkai pyrthei, namar ka thong jong ka Sorkar ka long ban khring ïa ki nongjngohkai pyrthei bad lada ki nongjngohkai pyrthei ki tuid sha ka jylla kane kan kyntiew ïa ka ïoh ka kot jong ki paidbah ha ka jylla.
U Symbud Myntri Rangbah u la bthah ba ïa kane ka kam la aibor ha ki Deputy Commissoner (DC) ba kin iakren katkum ki rukom treikam ka Sorkar. U la bthah ruh ïa ka Hima 12 Lyngdoh ban pynlong biang kum kane ka tamasa kaba kham heh ha Ri-Bhoi ha u snem 2019 khnang ba ka Sorkar ruh kan bei jingiarap pisa na ka bynta ban pynshlur ïa ka jingthmu ban pynneh pynsah ïa la ki riti ki dustur.
U MLA ka Umsning, u Bah Jason Mawlong Sawkmie haba kren kum u Symbud Kongsan kynthup ruh ia u MLA ka Mawhati u bah Dasakhiatbha Lamare bad u MLA ka Jirang u Bah Sosthenes Sohtun ki la pynpaw ka jingkmen ban iohi ba ka Hima 12 Lyngdoh ka don ïa ka thong ban pynneh pynsah ïa la ki riti ki dustur bad ka jinglong tynrai jong ka Hima kaba manla u nongshong shong u dei ban sngewthuh ïa ka jingkordor jong ki riti ki dustur.
Na ka liang u Syiem ka Hima 12 Lyngdoh, u Pa`iem Wanphrang Syiem haba kren ha kane ka sngi u la pynpaw ba ka thong kaba hakhmat eh ban pynlong kum kine ki tamasaw ka long ban kyrsiew thiah ïa ki paidbah ba kim dei ban klet ïa la ka tynrai bad ban bud tynneng ïa ka jong kiwei.
Ha ka jingpynkut noh ïa kane ka tamasa ba ar sngi, la pynphuh pynphieng ruh da ki jingshad tynrai na ki raid bapher bapher ba hap ha ka Hima 12 Lyngdoh ryngkat ki riam tynrai kaba la pynshongkun shongblei na ka bynta ka pateng ban wan jong ka jaid bynriew.
La sakhi lang ha kane ka sngi da ki Longsan ki Mansan ka Hima, ki Raid bad kumjuh ruh ki riew rangbah ba kynthup ïa u Bah C.B Syiem uba pyniaid ïa kane ka jingialang pynkut ïa ka tamasa, u Bah Augustine Wahlang Chairman ka Confederation of sports, Arts, and Culture ka Hima 12 Lyngdoh bad ryngkat ki khun samla kiba la mih pyrthei ha la ki riam tynrai kum ka jingkyntu ban pynneh la ki riti ki dustur.
Nalor kitei ki jingiaphylliew jingmut bad ki jingïakren halor ka jingdonkam ban pynneh pynsah la ki riti ki dustur la don ruh ki jingpyninam ïa kitiar tynrai, ki riam tynrai bad la pynkut ruh da ka jingïatem bom tynrai da ka jingshim bynta u Bah Prestone Tynsong, ki MLA bad ryngkat ka Deputy Commissioner ka Kong RM Kurbah.