Press "Enter" to skip to content

Kyndit bad ïeng pyrshah ka KHADC ba bsut ki Gram Sabha Committee ha ki Shnong

Ap jingma ïa ka iktiar ki RS bad DS : Latiplang
Shillong Nohprah 06 : Ka KHADC ka la pyrshah jur halor ka jingbthah na ka sorkar pdeng lyngba ka ophis jong u BDO ban thaw ïa ki Gram Sabha Committee ha ki shnong bapher bapher kiban peit bad pyniaid ïa ki skim bapher bapher kiba wan lyngba ka sorkar pdeng.
Ïa kane ka jingpyrshah la pynpaw nyngkong da u MDC ka Nongthymmai, Bah Latiplang Kharkongor uba la pynpaw ba lada ym don ba tuklar ym slem ba katei ka Committee kan long ha khlieh jong ki Dorbar Shnong bad ka iktiar ki Rangbah Shnong kan don ha ka jingma.
Kumta, haba kren bad ki lad pathai khubor ha ka sngi Palei, utei u MDC u la ong ruh ba la donkam kyrkieh ïa ka KHADC ban tuklar biang por halor katei ka jingbthah kaba wan beit beit na ka tnad Panchayati Raj jong ka sorkar pdeng lym kumta ki shnong ki thaw kin sah lut ha ka lyngoh bad ka umdum.
“Lada ailad bad pdiang ïa ka jingwan ka Panchyati Raj kan dei ka jingkut ïa ki Dorbar Shnong,” ong u Bah Latiplang da kaba bynrap ba u nongialam jong katei ka Committee u la ryngkat kyrdan bad u Rangbah Shnong. U ong ruh ba ka jingma kaba hakhmat eh ka long ha kito ki jaka ba shong khleh jaidbynriew namar ym lah satia ban khang ïa ka jingshim bynta kiwei ki jaidbynriew ban long dkhot ha katei ka committee kumba long ha ki dorbar shnong.
Shuh shuh u la ong ruh ba kum u nongmihkhmat ha ka thaiñ ba bun kiba shong khleh jaidbynriew, u sah ha ka umdum namar wat na ka liang ka ophis jong ka Block kaba ai ïa katei ka jingbthah ruh kim pat pynshai bha halor katei ka phang.
Halor kane ka bynta u kyntu jur ia u CEM ba donkam ban khot kyrkieh ïa ka jingialang jong ka Executive Committee khnang ba kinlah ban shim ïa ki sienjam kiba donkam katkum ba la pynkupbor ïa ka.
Haba ia kynduh pat bad u CEM ka KHADC, Bah HS Shylla halor katei ka bynta, u la iathuh ba wat na constituency jong u ruh ki la wan ban kylli halor katei kajuh ka phang. “Nga la ong ïa ki ba ngam pat lah ban ong ei ie namar ngim pat ïoh satia ïa ka jingtip kaba tikna,” u la ong. Shuh shuh u la iathuh ba hap ban khot kyrkieh ïa ka jingialang jong ka Executive Committee la sngi Nyngkong halor katei ka kam. Ha kajuh ka por u pynpaw ruh ïa ka jinglyngoh ba kumno ka sorkar pdeng ka iaid lait ïa ka sorkar jylla halor katei ka bynta.
U CEM u la ong ruh ba lada ailad kan poi ka por ba yn ym donkam shuh ïa ki District Council. Kumta u ong ba lada ka kam ka shah ki hap wat ban khot da ka Dorbar Kyrpang namar ki la ïohi lypa ïa ki jingma kiba lah ban wan. “Kumba long mynta ngim pat ïoh jingtip la ki don neem ki shnong kiba la dep thaw ïa ka Gram Sabha Committee, hynrei ngi la ïoh jingtip pat ba ka shongshit bha namar ba ka pisa kan wan beit beit sha ki lyngba ka block kumba long ka skim NREGS,” bynrap shuh shuh u CEM.
Kum u khliehduh jong ka Council u ong ruh ba ki hap ban shimkhia mardor halor katei ka phang namar kan ktah jur ïa ka jingtreikam jong ki shnong ki thaw bad wat haduh ïa ka District Council ruh.