Press "Enter" to skip to content

Mad jingeh ki paidbah ka thaiñ Mawshyn -rut ha ka liang ka koit ka khiah

Dkoh treikam ka MRB Riangdo Branch

Shillong, Nohprah : Ka Seng Federation Of Khasi Jaintia And Garo People (FKJGP), Mawshynrut Circle ha u kyrwoh lyngba u President bad Secretary ki pynpaw ka jingsngew khia kaba jur ha kaba ïadei bad ki jingeh kaba ki paidbah ka thaiñ Mawshynrut ki iakynduh ha ka liang ka koit ka khiah kumjuh ha kaba ïadei bad ka rukom treikam jong ka Meghalaya Rural Bank, Riangdo Branch.
Kumba kalong mynta ka Seng kala ong ba ka jingdkoh treikam ka Riangdo CHC kaba don ha Mawthengkut namar ka jingbym biang ki doktor kala wanrah jingeh shibun ïa ki paidbah ha kaba bun ki khep ki nongpang kila hap ban shu leitphai thylli shala shnong khlem da ïoh satia ïa ka jingsumar.
Kiba bun ki shnong ki don shajngai na katei ka CHC bad ki paidbah ki hap ban pynlut ym tang ka pisa hynrei wat ia ka sngi ka bylla jong ki kumjuh.Kiba bun kila hap ban pynlut na ka bynta ka jingsumar da kaba leit shaduh sha Nongstoiñ bad sha kiwei kiwei pat ki jaka kiba kham jngai.
Ka Seng kala ong ruh ba ki doktor kiba don mynta ha katei ka jaka sumar ki long tang u Dr Shira bad ka Dr. Sangma.Ha kaba iadei bad kane ka seng kala leit iakynduh ïa u CS jong ka West Khasi Hills la bun bunsien hynrei kam shym la don kano kano ka jingseisoh, hynrei tang ki jingkular suba ba yn sa pynbiang.
Kumta ka Seng ha ka 3 tarik mynta u bnai hapoh ka jingïalam jong u Genl Secretary ka Mawshynrut Circle u Bah Cary Oscar Kharmutee lem bad u Vice President u Bah Eveningstar Marthong, u Jt. Secy Bah A.Diengngan kila leit iakynduh biang ïa u CS ha Nongstoin ban rah biang ia kane ka jingeh jong u paidbah.Ha kane ka jingïakynduh na ka liang u CS ula kular ban shimkhia ia kane ka kam.
Kumta ka Seng ka kyrpad jur ïa ka sorkar ba kadei ban shimkhia mardor ïa kane ka kam bad ban pynbiang ïa ki doktor bad jingsumar khnang ba kan long ka jingmyntoi ïa ki paidbah ka thaiñ hi baroh kawei.
Ha kaba ïadei pat bad ka Meghalaya Rural Bank, Riangdo Branch, ka Seng kala leit ïakynduh ïa u Branch Manager ban ïakren halor ka jingdkoh treikam jong kane ka bank namar tang shu lip lait (light) kane ka bank kam lah ban treikam ha ka ban sei ne thep pisa, bad na ka liang ki nongtrei ki pynpaw ba ym don lait bad ym treikam shuh u generator mynta lah da ki bun bun bnai.
Kumta ka Seng kala ong ba kane ka wanrah jingeh shibun ïa ki paidbah namar kadei tang kane kawei ka bank kaba don bad kaba leh ïa baroh ki kam kynshew pisa kumjuh ki kam kiba ïadei abd ka MGNREGA, ki tulop bad kiwei kiwei.
Kumta na ka liang ka Seng ka kyntu ïa ka sorkar ba kan shimkhia ïa kane ka kam khnang ba kan wanrah ka jingmyntoi ïa u paidbah namar kumba kalong mynta kadon ka load shedding sha kane ka thain naduh ka por 1baje mynsngi haduh 4 baje jan miet bad lada kalong kumne ka pyni ba kane ka bank kan treikam tang lai kynta ha ka shi sngi.