Press "Enter" to skip to content

Pynsted ka NPP ban ïoh kurup biang ïa ka seat na Selsella Constituency

Shillong: Ka Seng National Peoples Party(NPP) ka la pynsted ïa ka jingpynkhreh ïa ka elekshon shiteng samoi na Selsella, ka Constituency ba la jop elekshon nyngkong eh u President jong ka bad u Myntri Rangbah ka jylla, u Conrad Sangma.
Ha ka sngi Palei, u Conrad u la hiar sha Abima kaba hap ha Selsella ban pdiang sngewbha ïa u Diliram Marak, uba la ïakhun ha ka elekshon baladep kum u kyrtong shimet bad ïoh palat lai hajar vote. La sngewthuh ba ka NPP ka lah ban pynïeng da u ban long u kyrtong ha kane ka elekshon. Ha ka elekshon 2018, ka kyrtong jong ka NPP, ka Ferlin S. Sangma, ka la shah pynliem ha u Kyrtong ka Congress, u Clement Marak, uba la khlad noh dang shen.
U Conrad Sangma kum u President ka Party, uba la jop ïalade na South Tura ha ka elekshon shiteng samoi, u la pynsted ïa ka jingtreikam da kaba hiar sha ka Constituency barim jong u, khnang ban pynkhlaiñ ïa ka Seng na ka bynta ban pynkhreh shaid shaid ïa kane ka elekshon, kaba lah ban long ryngkat bad ka elekshon sha Lok Sabha ha u 2019.
Kane ka jingle sted ka NPP, ka pynpaw ba ka elekshon shiteng samoi ha Salsella ka long kaba donkam bha ïa ka NPP, namar da ka jop nangne kan tam ka jingbun briew ïa ka Congress bad kan nang pynskhem shuh shuh ïa ka, kum ka nongïalam jong ka sorkar Meghalaya Democratic Alliance (MDA).