Press "Enter" to skip to content

Yn iakhun MDC u bah Anthony Nongbri na ka NPP na Malki-Laitumkhrah

SHILLONG: Ka National People’s Party (NPP) jong ka jylla Meghalaya ka la nang khlainbor ha kine ki sngi, hadien ba bun bah ki nongialam ka jylla ki la phai khmat sha ka NPP kaba ialam ia kane ka sorkar mynta. Katba hangne ha sor Shillong mynta ka sngi la ioh khubor ba uwei na ki heh barim ka UDP u bah Anthony N. Nongbri  uba la jubat ruh kum u Joint Secretary ka UDP Shillong City, u la leit ban pyniasoh ialade sha ka NPP ha ryngkat ki nongkyrshan ka UDP, Congress bad BJP ban pynkhreh ialade ban iakhun ia ka ilekshon MDC na ka 17 Laitumkhrah-Malki Constituency ka ban sa long ha u snem 2019.
Ha ba kren ha ka jingialang pdiang burom ba la pynbeit da ki nongialam baheh ka NPP ha ka ophis trei kam ka parti ha Lachumiere, Shillong,  u bah Anthony Nongbri u la pynpaw nyngkong eh ka jingsngew nguh ia u Blei Nongbuh Nongthaw, uba la ker la da ia u na bun bah ki jingeh bad jingtynjuh bad um lah khlem da sngewnguh ia ki nongialam ka parti NPP kiba la khot sngewbha ia u sha ka parti ban iakhun ia ka MDC na kane ka parti. U bah Nongbri u la ai khublei ruh ia baroh ki nongkyrshan kiba ju iatrei lang mynba u dang don ha ka UDP ki bym shym la iehnoh bad kiba la ia rung lang bad u sha ka NPP, khlem da klet ia ki paidbah kiba rai ban kyrshan ia ka NPP.
Ha kane ka sngi la ioh ruh ia ka jingkren na ka liang u Working President ka State NPP u Dr. Don War, uba la iaroh ia ka jinglong babha une u samla da kaba ong ba bun bah kiba la ithuh ithaw ia une u samla kin kubur ia ka jinglong sngewrit, jemnud bad shitrhem jong u ha kaban trei na ka bynta ka imlang sahlang ha ka lynti ka ba beit bad bakhuid.
Ha kajuh ruh ka por u la ong ba ka parti NPP kan nang khlain da ka jingdon kum kine ki khun samla rangbah ki ba don ka nongrim baskhem ban ai ka jingshakri babha ia ka Constituency, ia ka Ri bad ka jaitbynriew. Ha kajuh ruh ka por u la pynskhem ia ki Nongkitkam ka NPP 16-East Shillong Block Committee ka ban sa ialam da u ne u samla rangbah uba la pyniasoh ialade bad ka parti.
Ia ka jingialang pdiang burom ha kane ka sngi la pyniaid da u bah Kupar Blah President ka NPP Shillong City, uba la pynpaw ia ka jingkmen ba ka parti kan ioh ia u kyrtong ba la ih bha na kane ka Constituency na ka bynta ka ilekshon MDC ka ban wan bad u la kitbok ia baroh kiba la pyniasoh ialade bad ka parti ban trei shitrhem na ka bynta ban ioh ia ka jingjop na Laitumkhrah-Malki Constituency.
Ha kane ka sngi la ioh ruh ia ka jingkren bad jingduwai na u District President ka NPP West Jaintia Hills u Ma O. Lamin ha ryngkat ka jingiadonlang u Ma B.Toi Secretary Incharge Jaintia Hills District bad ia ka jingkhublei pynwai la ai da u Vice President ka NPP Shillong City u bah M. Kharpuri.