Press "Enter" to skip to content

Yn khot ïakren ka Sorkar ïa ka Synjuk ki nongdie madan ba satah ka jaboh ha lynti ïaid

Shillong, Nohprah 06: Ka Sorkar Jylla shen kan sa khot sha ka miej jingïakren ïa ka Synjuk ki nongdie madan kiba don hapoh ka shatri jong ka Greater Shillong Progressive Hawkers & Street Vendors Association (GSPHSVA) ban ïasyllok ha kaba ïadei bad ka jingwanrah ïa ka jingkhuid jingsuba jong ki surok bad ki lynti ïaid paidbah ha kylleng ki bynta ka Sor Shillong.
Ka Sorkar Jylla ka la shim ïa ka rai ha ka jingïalang kaba la long hynnin ka sngi balang bad ka tnat Pynroi Sor ha kaba la ïadonlang u Myntri Rangbah ka Jylla, u Conrad Kongkal Sangma, u Myntri ka tnad Pynroi Sor u Bah Hamletson Dohling, u Director General of Police (DGP), ki ophisar ka tnad Pulit, u Principal Secretary ka tnad Pynroi Sor Bah DP Wahlang, u Chief Executive Officer (CEO) ka Shillong Municipal Board (SMB) bad kiwei kiwei.
Ha kane ka jingïalang, la ïathir sani bha halor ka jingkhapngiah ka Khyndai Lad na ka jingkharoi ki nongdie madan bad ka jingkharoi ki nongdie dukan ha ki rud surok bad lynti ïaid kjat ha Khyndai Lad.
“Ka sorkar kan sa ïakynduh bad ka Synjuk ba dei peit ïa ka bha ka miat kiba die dukan bad shong die jingdie harud lynti ïaid kjat shwa ban shim ïa ka rai na ka bynta kiba im ja da kaba die jingdie harud surok bad lynti ïaid kjat bad katno ngut ki don,” ong u Bah Hamletson Dohling.
“Ngin sa ïakren halor ka mat jingkyntur ki nongdie dukan harud surok bad lynti ïaid kjat bad ka jingshim ïa ki lad ai jingïada ïa ki. Ngi don ka jingsngew khia halor ki jingeh ba ki lah ban ïakynduh,” la bynrap u Bah Hamlet.
U la ïathuh ba ka Sorkar kam kwah ban leh kyrkieh haba shim ïa ki sienjam ban weng ïa ki jingeh bad pynpaw ruh ba ka Sorkar kam kwah ban ïatyngkhuh bad ka Iingbishar High Court ka Jylla namarba kumba ka long mynta kane ka mat ïakren ka dang don hapoh ka miej jong ka Iingbishar High. U la ïathuh ruh shwa ban ai jubab sha ka Ingbishar High Court ka Sorkar ka kwah ban ïakren shwa ïa ki jingeh ba paidbah ki ïakynduh.
“Ka jingïakynduh bad ka Synjuk ki nongdie madan kan long ka jingïamir jingmut halor ka jingtur palat sha ki surok ïaid kali bad lynti ïaid kjat ki briew bad ka jingïada ïa ki,” la ong une u Myntri ka tnat Pynroi Sor bad kdew ruh ba ka Sorkar kan ym don jingkitkhlieh ïa kino kino kiba shong be-aiñ.
Ha kaba ïadei ka jingpynjakhlia, une u Myntri ka tnat Pynroi Sor u la pynpaw ba ka Sorkar ka la mana tyngeh ban bret jakalia ne pynjaboh ha ki lynti syyngkien. “Ngi donkam ïa ka khuid ka suba bad ka dei ka bynta kaba ka Sorkar ka buh hakhmat eh”, u la ong.
“Ngi la rai ba na ka liang ka Sorkar kan pynjari da ki kyndon ban pynshitom tyngeh ïa kiba pynkheiñ aiñ ha kaba pynjaboh ïa ki lynti syngkien. Ki bor synshar distrik bad ka tnad Pulit ryngkat ka Shillong Municipal Board kin shimkhia ban peit bad pynshitom ïa kiba pynkheiñ aiñ,” u la ong.
U la ong ba ka Sorkar ka kyntu ïa ki paidbah ba ki dei ban don ïa ka jingkitkhlieh na ka bynta ka khuid ka suba.