Press "Enter" to skip to content

Ar taiew ai por ki nongtrei bashah leh beiñ ha ki bor pynïaid ka GVK EMRI

Shillong, Nohprah, 08: Ka Meghalaya EMRI Workers Union (MEMRIWU) kaba long ka synjuk jong ki nongtrei ka GVK EMRI kiba kynthup ïa ki Paramedics bad ki Pilots ki la ai por ar taiew ïa ki bor pynïaid jong ka GVK EMRI, Meghalaya ba kin pynurlong ïa ki jingdawa ha kaba ïadei bad ka jingsiew ïa ka tulop, ka jingai shuti, ka jingtrei tam ïa ka por trei bad kiwei kiwei.
Ha ka dorkhas ba ka seng ka la phah sha ki bor pynïaid ka GVK EMRI, Meghalaya, ki la pynpaw ïa ka jingsngewkhia halor ka jingshah lehbeiñ ha kaba ïadei bad ka jingsiew nalor ba ki dei kiba hakhmat eh ban ai jingsumar ïa ki paidbah nongshong shnong ka jylla haba ki ngat ha kino kino ki jingjia basngewsih manla ka arphewsaw kynta.
Katkum ka dorkhas, ka MEMRIWU ka la dawa ïa ki bor pynïaid ba ki dei ban sngap ïa ka jingdawa ha kaba ïadei bad ka khiah ka shon bad ki jingeh ba ki nongtrei ha kylleng ka
jylla ki ïakynduh mawsiang. Ka Seng ka la dawa ruh ba ki bor pynïaid ki dei ban pyntreikam ïa ka jingai shuti katkum ki kyndon ba la kdew ha ka Meghalaya Shops & Establishment Act and Factory’s Act. “Ïa kane ka polisi dei ban pyntreikam da kaba ïasyllok shwa bad ki nongtrei,” ong ka dorkhas jingdawa ba la soi da u President u Bah Roypar Raswai bad ka General Secretary ka Susan Lyngdoh.
Ïa kane ka dorkhas ka Seng ka la leit aiti sha ki bor pynïaid ha ka 6 tarik mynta u bnai ha ryngkat ka jingsynran lang ka Convenor jong ka Thma u Rangli Juki, ka Kong Angela Rngad.
Ha kaba ïadei bad ka tulop, ka MEMRIWU ka la dawa ba ki bor pynïaid ki dei ban siew ïa ka tulop kaba mar katjuh ïa baroh kumba long ki nongtrei ha ki tnat treikam ba la bei jingïarap da ka Sorkar.
Ka Seng ka la pynpaw ruh ba ka jingpynkynriah kam ïa ki nongtrei ka dei ban long katkum ka jaka ba ki nongtrei ki ïasngewthuh ïa ka ktien ka thylliej.
Nalor kine ki jingdawa, ka MEMRIWU ka la dawa na ki bor pynïaid ba ka GVK EMRI, Meghalaya ka dei ban pynbiang ïa ki Ambulance da kaba maramot na ka por sha ka por.
Kane ka kynhun ki nongtrei ka GVK EMRI, Meghalaya ki la pynpaw ruh ïa ka jingsngewkhia ïa ka jingshim kabu ki paidbah ha kaba ka EMRI (108) Services ka long tang ban ai jingsumar kyrkieh ïa ki briew kiba donkam jingïarap kyrkieh hynrei ki don pat kiba pyndonkam bakla da kaba phah buh tang ïa ki nongpang sha iing.
“Dei ban pynlong ruh ïa ki eksamin katkum ka jingslem bad ka jingtbit ha ka kam, bad lada don kano kano ka jinglaitkam, ki bor pynïaid ki dei ban pyntip nyngkong shwa sha ki nongtrei ba la trei lypa,” ong ka dorkhas ba la soi da ki nongïalam ka Seng bad bynrap, “haba don ka jingthylli ka kam ha ophis ngim ju ïoh jingtip.”
Ka Seng ka la dawa ba ki bor pynïaid ka dei ban don ïa ka shnat ba peit kaba sngap ïa ka jingud jong ki nongtrei ïa ki jingeh ba ki ïakynduh bad dawa ruh ba dei ban pynrung nongmihkhmat na ka Seng ha kane ka kynhun khnang ba ka jingtreikam kan long kaba khuid bad kaba shai.
“Ngi kyrmen ba phin sngap ïa ki jingdawa jong ngi hapoh ar taiew bad lyngba ka jingïakren katkum ba la kdew ha ki kyndon aiñ jong ka Labour Act. Lada kam don kano kano ka jubab hapoh ar taiew ngim banse ban pynlong da ka jingïakhih,” la byrngem kine ki nongïalam ka MEMRIWU.