Press "Enter" to skip to content

Bei jingïarap ka Sorkar da ki tiar sha ki nongsumar dawai kynbat ka Jylla

Shillong, Nohprah, 08: Ka Sorkar Jylla hynnin ka sngi thohdieng ka la sam da ki tiar shna dawai sha ki nongsumar dawai kynbat kiba don ha kylleng ka jylla ha ka jingïalang kaba la pynlong da ka Bio Resources Development Centre ha Soso Tham Auditorium, Shillong.
Ïa kine ki tiar ba la sam sha ki nongsumar dawai kynbat ha kane ka sngi, ki dei kiba la bei jingïarap pisa da ka Ministry of Tribal Affairs jong ka Sorkar Pdeng lyngba ka projek ban ïarap ïa ki nongsumar
dawai kynbat, lyngba ka Article 275(1).
Ha kane ka sngi, u Myntri ka Koit ka Khiah ka sorkar Jylla, u Bah Alexander L. Hek u la long u Kongsan ha ryngkat ka jingïadonlang jong u Secretary jong ka tnat ka Koit ka Khiah ka Sorkar Jyllla, u Pravin Bakshi uba long ruh u Director jong ka tnat AYUSH ka Sorkar Jylla, u Member-Secretary ka Bio Resources Development Centre u Bah Cyril DV diengdoh bad kiwei kiwei ki kynrem ki lyndan.
U Bah AL Hek haba kren ha kane ka sngi, u la ong ba ka jingsam ïa kine ki tiar jingïarap sha ki nongsumar dawai kynbat jong ka jylla ka long ban kyntiew ïa ka jingsumar dawai kynbat lyngba ka jingïarap jong ka saian. U la ong ruh ba ki nongsumar ki dei ban ïasam ïa ka jingnang jingtip jong ki sha ki pateng ba dang wan khnang ba ka jingnang jingtip kaba ki ïoh kan roi pateng la pateng.
“Ka long kaba donkam ban thaw ïa ki kynhun ban ïasam ïa ka jingnang jingtip lada ngi angnud ban kyntiew ïa ka Koit ka Khiah ha ka jngohkai pyrthei ha ka Jylla Meghalaya,” ong une u Myntri ka tnat ka Koit ka Khiah. U la ong ruh ba ki nongsumar dawai kynbat ki donkam haduh katta katta ka jingkyrshan jingïarap na ka Sorkar Pdeng bad na ka Sorkar Jylla.
Ha kaba ïadei bad ka jingriewspah jong ka Jylla ha ka jingdon ki kynbat dawai, une u Myntri ka tnat ka Koit ka Khiah u la ong ba ka Jylla Meghalaya ka lah ban kiew shaphrang ha ka ri bad ha ka pyrthei hi baroh kawei ha kaba ïadei bad kane ka rukom ai jingsumar.
U la khot bad wer ïa ki paidbah ba kin long ki nongïada bad ban pynnneh pynsah ïa ki jingthaw ba im kiba don ha ka Jylla khnang ba ka kam sumar da ki dawai kynbat kan ïai bteng na u snem sha u snem.
Ka Dr. D Roy, ka la pyntip ba ka QCI ka dei ka shlem ai jinghikai bapawkhmat ba la thaw da ka Sorkar Pdeng lyngba ka Ministry of Commerce. Ka la pyntip ruh ba ka NECU ka dei kaba la ju ai jingithuh ïa ka jingai jinghikai sha nongsumar dawai kynbat ka Jylla. Ka la ong ruh lyngba ka syrnot ba la ïoh na ka NECU kan ïarap ïa ki nongsumar dawai kynbat ban ïoh ïa ki skhim bapher bapher na ka Sorkar ban pynïar shuh shuh ïa ka kam kaba ki trei.
Kiwei kiwei kiba la ai jingkren ha kane ka sngi ki kynthup ïa u Bah Cyril VD Diengdoh, u Pravin Bakshi bad u Prof. D Khating.